Seaman patay uban sa iyang asawa ug anak human ang ilang awto nga gisakyan nabangga sa wing van nga gikasugat sa Martes sa alas 12:10 sa udto, Pebrero 21, 2023 sa National Road, Brgy. Dunggoan, Danao City.
Patay si Erwin Bacalso Mondejar, 35, seaman, taga Santo Rosario, Barangay Poblacion, Macrohon, Southern Leyte, kinsa maoy nagmaneho sa Mitsubishi sedan, kolor itom (GED-2568).
Namatay sab ang iyang asawa si Imelda Mondejar ug anak nga babaye nga si Erin Bliss, 3.
Samtang naangol ang lain nilang anak nga si Imer Betelqeuse Mondejar, 7.
Gitanggong usab sa kapulisan si Nolin Batobalonos, 26, taga Barangay Maricaban, lungsod sa Santa Fe, drayber sa Isuzu wing van.
Si Police Master Sgt. Ronald Gomez, sa Danao City Police Station nga nahinabi sa Superbalita Cebu, nagkanayon nga ang mga biktima gikan nanuroy sa Safari Adventure Park sa lungsod sa Carmen.
Kini base sa ilang nakit-an nga hulagway sa ilang selpon nga wala pay udto didto ang pamilya sa maong park.
Giingong padulong sila sa dakbayan sa Sugbo kay magpa-check up sa doktor ang asawa.
Matud ni Gomez nga si Batobalonos nibutyag nga nagkarga siya og mga feeds paingon sa norte sa lalawigan sa Sugbo.
Nakita ni Batobalonos ang awto nga kusog kaayong dagan nga nisubay sa iyang lane. Gani giserbatuhan niya kini aron makuha ang atensiyon sa drayber apan milahos kini ug nabangga sa iyang gimaneho.
Si Batobalonos niingon nga siya nikabig sa iyang truck sa daplin sa iyang lane aron lihayan ang awto, apan gumikan sa kakusog sa dagan niini padung kaniya, naabtan siya ug nagkabangga ang duha ka mga sakyanan.
“Makita man sa sketch nga pahid na kaayo sa daplin ang wing van. Pero midaro ang awto nga kusog kaayo (ang dagan),” paghulagway ni Gomez.
Ang drayber, asawa ug usa ka anak dead-on-arrival (DOA) sa tambalanan sa Danao City.
Samtang ang 7 anyos nga batang lalaki naka-survive nga gikatahong adunay bali sa tiil.
“Akong tan-aw nakatulog ning bana nga nagmaniho tungod sa kalapoy sa biyahe, kay bisan giunsag serbato sa driver sa wing van, wala manumbaling,” saysay ni Gomez.
Samtang ilang sutaon kon duna bay makuha nga footage sa dash cam sa sakyanan aron makatabang sa imbestigasyon sa ingon masuta kon unsay nahitabo sa wala pa ang insidente.
Sa impormasyon gikan sa igsuon sa seaman nga natawgan sa kapulisan, ang pamilyang Mondejar nangabot sa Sugbo niadtong Lunes, Pebrero 20.
Gipaabot sa kapulisan ang kabanay sa mga biktima.