Libuan ka mga individual sa lalawigan sa Sugbo ang nakabenepisyo sa Sugbo Kahanas Skills Development Program sa Cebu Provincial Government nga nakig-alayon sa Technical Education and Skills Development Authority (TESDA-7) niadtong 2022.
Gibutyag ni Regional Director Gamaliel Vicente Jr., sa Tesda 7 nga pinaagi sa P100 milyunes nga pundo gikan sa Kapitolyo aron mapatuman ang programa ni Cebu Governor Gwendolyn Garcia, kini nakatabang sa 4,329 ka mga individual.
Lakip sa vocational courses ang bread and pastry production, dress making, electronic production assembly, driving, organic, masonry, swine ug welding.
Ang mga tinun-an sa short term courses gihatagan og libreng training, free assessment, free entrepreneurship training, GSIS accident insurance (1 year), allowance nga tag P160 matag adlaw, P500 nga internet allowance, health/PPE allowance (P500) ug starter tool kits.
Ang programa gilusad sa Lalawigan sa Sugbo aron matabangan ang mga Sugbuanon nga naapektuhan sa grabeng pag-igo sa pandemya sa Covid-19 nga mahatagan sila og panginabuhian.
Si Vicente nagkanayon nga ang Kapitolyo ug iyang buhatan nilagda na usab og agreement alang sa ikaduhang hugna sa Sugbo Kahanas nga mopaeskwela og susamang gidaghanon sa mga benepisyaryo nga gikan sa pito ka mga distrito sa lalawigan sa Sugbo.
Ang P100 milyunes gikan sa Kapitolyo gibahin sa 14 ka mga board member nga nihatag sa ilang budget og tag P5 milyunes, P5 milyunes gikan sa Association of Barangay Council (ABC), P5 milyunes sa Philippine Councilors League (PCL), P5 milyunes sa SK Federation ug P15 milyunes gikan sa Office of the Vice Governor.