Hugot nga siguridad ipatuman sa kapulisan sa dakbayan sa Sugbo atol sa pagbisita ni Presidente Ferdinand “Bongbong” Marcos Jr. sa sunod semana aron motambong sa pagsugod sa pagtrabaho sa Cebu Bus Rapid Transit (BRT) system.
Kon dunay mag-rally nga mga pundok, ila kining pangitaan og permit.
Nipasabot si Police Lieutenant Colonel Janette Rafter, deputy city director for operations sa CCPO, nga gikinahanglan kini kay Presidente ang bisita sa siyudad.
Nunot usab niini, gibutyag ni Rafter nga giandam usab nila ang Civil Disturbance Management team sa kapulisan.
Hinuon, wa sila masayod sa schedule ni Marcos dinhi sa Sugbo ug sa ubang mga sakop sa Kabinete, apan andam sila kanunay sa paghatag og seguridad.
Dunay mga coordination meeting nga gipatawag ang Kagamhanan sa Dakbayan sa Sugbo alang sa pagpangandam sa pagbisita sa labing taas nga opisyal sa Pilipinas.
I-isa sa kapulisan ang ilang alert status sa maong adlaw hangtod nga makabiya balik sa kaulohan.
“As of now naa na tay mga initial security preparations. Once nga Presidente ang moabot, daghan nag-protocols nga sundon, but on our level we already prepared our security plan and security deployment,” matud ni Rafter.
Wala na mohatag og gidaghanon si Rafter kon pila ka personnel ang ipakatap sa dapit diin ipahigayon ang programa sa pagsugod sa BRT project apan iyang gipasalig nga sakto na kini aron mohatag sa siguridad.