Sakyanan sa laing seaman nalimbuwad hinungdan sa iyang pagkaangol, apil ang iyang asawa ug duha ka mga pasahero sa alas 3:00 sa kaadlawon sa Miyerkules, Pebrero 22, 2023 sa national highway sa Brgy. Yati, lungsod sa Liloan.
Ang mga biktima giila nga sila si Franklin Ferrer, 57, minyo, taga Purok 2 , Brgy. Nangka, lungsud sa Consolacion, nagmaniho sa Nissan Navarra, iyang asawa nga si Romualda, uban ang mga pasahero nga sila si Roberto Tibay, ug laing lalaki wala nakuha ang ngalan.
Si Patrolman Jicliff Guilaran, imbestigador sa Liloan Police Station nga nahinabi sa Superbalita Cebu sa Miyerkules, nagkanayon nga si Franklin uban sa asawa ug duha ka mga higala padulong sa lungsod sa Compostela kay dunay ihatud nga dukomento.
Sa ilang pag-abot sa nahisgutang lugar, wala siya makabantay sa concrete barrier sa tunga sa karsada tungod kay ngitngit kaayo ang maong dapit.
Gawas pa niini, si Franklin nipadayag sa kapulisan nga dili siya sinati sa karsada.
Wala siya magdahom nga sa iyang pag-agi sa tunga sa iyang lane, iyang madasmagan ang barrier. Tungod sa kakusog sa impact, nahayang ang Nissan Navarra. Sila si Franklin ug Romualda gipangdala sa Amusop Seamen’s Hospital sa dakbayan sa Mandaue.
Samtang si Tibay gidala sa tambalanan sa Danao City.
Gihulagway ni Guilaran nga di grabe ang kahimtang sa mga biktima apan daghan og mga bun-og. Usa sa mga pasahero nga wa nihatag sa iyang ngan wa naunsa.
Sumala ni Guilaran nga daghan na ang nangadisgrasyang sakyanan sa dapit tungod sa road barrier. Iyang gibasol ang kangitngit sa dapit hinungdan nga di makita ang barrier.
Si Franklin maoy ikaduhang seaman nga naaksidente sa sakyanan sulod sa 24 oras sa northern Cebu.
Niadtong Martes sa udto, namatay ang usa ka seaman, uban sa iyang asawa ug usa ka anak, dihang nabangga sila sa usa ka wing van sa dakbayan sa Danao samtang nagsakay sa ilang awto.
Usa nila ka lalaking anak nga 7 anyos ni-survive.