Gibasol sa kabomberuhan ang katol nga maoy sinugdanan sa sunog nga nakapatay sa usa ka foreman sa alas 9:50 sa gabii sa Martes, Pebrero 21, 2023 sa Brgy. Pasil, lungsod sa Santander, habagatang Sugbo.
Si Ildebrando Villaver, hingkod, minyo, foreman sa mga trabahante nga nagtrabaho sa karsada sa Oslob-Santander, taga Brgy. Lawaan, dakbayan sa Talisay, paig nang nakaplagan sa mga bombero sa Oslob dihang napawong na ang kayo.
Si FO1 Christian Maturan, imbestigador sa Oslob Fire Station nga nahinabi sa Superbalita Cebu, nagkanayon nga ang sunog ilang giisa sa 1st alarm.
Ilang nakontrolar ang kayo alas 10:23 sa gabii ug hingpit nga napawong paglabay sa pito ka minutos.
Ang danyos nga gibilin sa sunog mokabat sa P14,000.
Ang atop sa balay sin, karaang kahoy ang sawog ug amakan ang bongbong.
Matud pa ni Maturan nga ang biktima dunay 14 ka mga sakop nga nag-ayo sa karsada ubos sa pagdumala sa Department of Public Works and Highways (DPWH).
Nag-abang sila sa balay nga gipanag-iya ni Editha Miran, 60, biyuda.
Ang silingan nga si Laureta Serencio, 64, nakugang dihang iyang nakita nga nasunog ang terrace sa balay nga giabangan sa biktima.
Si Villaver nag-inusarang natulog niadtong higayuna.
Matud ni Serencio nga nitawag sila sa Municipal Disaster Risk Reduction and Management Office (MDRRMO), kapulisan ug bombero.
Daling nakapadala og water tanker ang local government unit (LGU) apan pag-abot sa bombero dako na ang kayo.
Sumala ni Maturan nga ang kaubang trabahante sa biktima nitug-an nga nag-inom sila’g duha ka mga botelya sa Red Horse sa alas 6:00 sa gabii sa Martes.
Nasuta nila nga si Villaver magbutang og katol sa iyang tiilan agi og pang-abog sa mga lamok sa di pa matulog.
“Permi ni siyang mopalit og katol sa tindahan. Unya anha niya ibutang sa iyang tiilan kon matulog. Basin sa pagkaupos natagak sa sawog, misilaob ang kayo,” dugang ni Maturan.
Nasuta nila nga sa ubos sa panimalay, tungod sa higdaanan sa biktima, naa ang mga gamit sa construction sama sa pintal, oil, grass cutter, gasolina ug uban pa.
Gituohan sa mga bombero nga dihang naupos ang katol, natagak sa sawog nga karaan ug mikayo, dayon gidakop ang ubang mga gamit sa maong kayo.
Tungod kay amakan ang bongbong ug dunay daghan nga mga sinina, paspas nga nikatap ang kayo.
Siya nidugang nga gumikan kay nakainom ang biktima, hayan wala siya nahigmata sa pag-ulbo sa kayo.