Maagian sa BRT project pabayran ni Garcia

File Photo
File Photo

Gusto ni Cebu Governor Gwendolyn Garcia nga bayran sa Department of Transportation (DOTr) ang Kapitolyo sa mga luna nga maagian sa Cebu Bus Rapid Transit (CBRT) project.

Kini gipadayag ni Garcia atol sa panagtagbo tali sa gobernador ug mga engineer sa DOTr nga gitahasan sa pagpatuman sa proyekto sa siyudad sa Sugbo.

Ang proyekto sugdan sa pagtrabaho sa Lunes, Pebrero 27, 2023 nga tambungan ni Presidente Ferdinand “Bongbong” Marcos Jr.

Subay sa taho sa Sugbo News, media arm sa Kapitolyo, gipresentar ni Engineer Norvin Imbong, project manager, ang layout sa unang phase sa proyekto nga gikatakdang subhan karong Lunes.

Ang maong proyekto gipundohan og P17 bilyunes, diin ang unang phase gigahinan og P1 bilyon.

Maagian sa BRT project ang luna sa Kapitolyo nga motadlas sa Osmeña Boulevard, mo right turn sa Cebu South Bus Terminal agi sa N. Bacalso Avenue.

Matud ni Garcia nga ang luna sa Kapitolyo gitagana isip agianan, hinungdan nga wala kini matumong sa himuon nga bus stations sa CBRT.

Subay niini, gipaninglan sa Kapitolyo ang DOTr sa “just compensation” sanglit gawas sa bus stations nga may gidak-on nga 160 metro kwadrado, pamutangan usab kini og drainage systems sa matag kilid sa sidewalk.

“We do not want to hamper this project, but you have to accept that the Capitol deserves just compensation,” matud ni Garcia pinaagi sa Cebu Provincial Information Office.

Sa interbyu sa mga tigbalita sa Huwebes, Pebrero 23, 2023, matud sa gobernador nga kinahanglan nga magsabot una ang Kapitolyo ug DOTr kalabot sa paggamit sa luna.

Niini, magtukod og technical working group ang Probinsya ug DOTr nga maoy modeterminar pila ang bayranan ngadto sa Kapitolyo.

Nisaad ang grupo nga ipadangat nila ang maong concern sa board meeting sa buhatan sa Pebrero 24, 2023.

Ang CBRT proyekto nga mass transit system sa dakbayan sa Sugbo nga may rota gikan sa Bulacao sa habagatan paingon sa Talamban sa amihanan. Moagi kini sa Cebu South Road, N. Bacalsco Ave., Osmeña Boulevard, Escario St., ug sa Gov. M. Cuenco Ave. nga mokonektar na usab sa mga dan paingon sa Osmeña Blvd., Capitol Site, Cebu Business Park, ug Cebu IT Park.

MAG-AGAD

Si Imbong, sa iyang bahin, niingon nga moabot karong adlawa dinhi sa Sugbo ang ilang kadagkuan alang sa usa ka tigom busa iya kining hisgutan.

Iyang gipasabot nga dili siya makahukom sanglit igo ra siya nga tigpatuman sa proyekto ug kon adunay masugatan nga problema, iya kining i-refer sa ilang kadagkuan.

Si Imbong nagkanayon nga ipahigayon karong Pebrero 27 ang ceremonial ground breaking nga tambungan sa mga opisyal sa dakbayan sa Sugbo pinangulohan ni Mayor Michael Rama ug Bise Mayor Raymond Garcia.

Si Rama nagkanayon nga tambungan ang kalihukan ni Marcos, kinsang schedule maoy giagad sa Cebu City Government aron pormal nang masugdan ang construction sa multi-billion mass transport project.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph