MALAMPUSONG nadakpan sa mga pulis ang usa sa mga suspek nga mipusil patay sa sakop sa Traffic Management Unit (TMU) alas 10:00 sa gabii, Pebrero 22, 2023, sa Tagum City.
Biktima giila nga si Ricarte Salazar Sr., 50, taga Purok Ilang-ilang, Barangay Bincungan, Tagum City.
Sa gihimong pakipaghinabi sa SuperBalita Davao kang Police Captain Anjanette Tirador, deputy chief sa Tagum City Police Station, gibutyag niini nga ang biktima nag-duty niadtong higayona dihang miabot ang duha ka wala mailhing mga suspek nga nag-angkasay sa single nga motorsiklo.
Matud pa nga sa wala masayring hinungdan, diretsong gipusil sa angkas sa motor ang biktima tumong sa lawas nga miresulta sa iyang hinanaling kamatayon.
Human sa gihimong pagpamusil, mga suspek nagdaling nangagiw paingon sa wala masayring direksiyon.
Apan kapulisan daling milusad og hot pursuit operation batok sa mikagiw nga mga suspek hinungdan nga usa kanila nadakpan sa dihang nabangga ang gisakyan nilang motorsiklo sa Barangay San Miguel sa nahisgutang siyudad atol sa ginukdanay.
Gibutyag ni Tirador nga ang gunman maoy nakasibat samtang ang driver maoy nadakpan human nga naipit sa gimanehong motor.
Wa pa hinganli sa opisyal ang suspek nga anaa karon sa kustodiya sa Tagum City Police Station sanglit aduna pa sila'y gihimong lakang aron madakpan ang nakasibat niining kauban ug masayran ang matuod nga motibo nga nagpaluyo sa krimen.
Ang hitabo giingon nga maoy unang insidente sa pagpamusil sa siyudad sa Tagum karong tuig 2023.