Daghang debate kon kinsay uyon ug dili nga ang prosecutor sa International Criminal Court (ICC) ato bang pasudlon dinhi sa Pilipinas o dili. Ang mga kongresista pinagulohan ni kanhi presidente ug Kongresista Gloria Macapagal Arroyo mipasar og resolusyon nga nagdepensa kang kanhi Presidente Rodrigo Duterte batok sa bisan unsang imbestigasyon ug prosekusyon sa ICC.
Ang 19 ka mga kongresista miinsister nga naglihok ang judicial system sa nasud ug libre kining mohukom kon si Duterte nakahimo ba og crimes against humanity sa iyang kampanya batok sa ginadiling drugas.
Apan si ICC Prosecutor Karim Khan wa matagbaw sa gihimo sa gobiyerno sa Pilipinas mao nga mihangyo siya sa ICC Pre-Trial Chamber (PTC) nga tugotan siya sa pagpadayon sa iyang imbestigasyon.
Mao na kini ang nakabahin sa baruganan sa katawhan karon. Samtang ang gobiyerno pinangulohan ni Presidente Bongbong Marcos dili uyon nga mangimbistigar ang ICC dinhi sa nasud, apan ang mga oposisyon ug mga walhon buot gayud nga humanon kining kaso ni Duterte.
Wa pa hinuon makahukom ang Senado og unsay ilang baruganan.
Ang mga independente buot nga atubangon ni Duterte ang iyang kaso. Unsa man kunoy iyang kahadlokan kon nagtuo siyang wala siyay sala?
Apan unsa may mahimo sa ICC kon dili moatubang ang mga suspek sa ilang imbestigasyon?
Makahimo sila og issue og warrant of arrest apan ipaagi gihapon nila sa mga tinugyanan sa Pilipinas ang pagdakop sa suspek ug ilang iduso ngadto sa ICC. Wa usab silay police force.
Mura og huyang man ang gahom niining ICC. Gani ang Estados Unidos (US) wala man moila sa hurisdiksiyon niining ICC. Gawas sa US, dili usab sakop nila ang China, Russia ug India.
Nahimo kitang sakop niining maong kahugpongan niadtong 2011 diin nahimo kitang ika-117 nga miyembro apan mibiya ang nasud niadtong Marso 17, 2019.
Gani si Judge Raul Cano Pangalangan maoy unang Pilipino nga nahimong huwes sa ICC. (mannyrabacal1144@gmail.com)