Nakapanghupaw ko sa makadiyot sa dihang akong nabasahan sa nasyonal nga mantalaan nga aduna na diay Margielyn Didal Skate Park nga gitukod ang Borongan City sa Eastern Samar nga gani giinagurahan na kagahapon, Sabado, Pebrero 25, 2023.
Kini nahimutang sa Baybay Beach sa gitawag og Surf City sa nahisgutang siyudad.
Mismong ang sikat nga Cebuana skater nga si Didal ug ang National Skateboarding Team gikatakdang motambong sa inagurasyon diin sa samang higayon, mopahigayon usab sila og free clinic alang sa mga interesado ug potensiyal nga mamahimong skateboarders.
Kini maoy unang skate park sa Samar Island ug si Didal mismo maoy ni-design niini.
Niadtong Disyembre 6, 2021, ang nainilang atleta kinsa nakahatag og igong dungog sa tibuok nasod human kini makahagpat og mga medalya sa international competitions, pinaagi sa resolution sa Sangguniang Panlungsod, nahimong adopted citizen sa nahisgutang siyudad.
Tungod sa iyang mga kalampusan sa natad sa paugnat sa kusog, iyang nakabig ang kasingkasing sa yutang Pilipinhon ug gilantaw sa kadaghan nga usa ka sumbanan sa kabatan-unan.
Ako ning gihisgutan ning atong lindog kay mora man og dako ning tamparos sa mga Sugboanon ilabi na sa dakbayan sa Sugbo.
Samtang ang taga laing lugar nga nagpakahilom lang sa sinugdanan, sa kalit lang surprisang gihimoan ug gipahinungdan si Didal og skate park nga maka motivate sa ilang kabatan-unan.
Sa dihang misibaw og maayo ang ngalan ni Didal human sa sunodsunod niyang kadaugan sa mga international competitions, ilabi na sa 2018 Asian Games diin siya nakalangkat og gold medal, katam-is sa pasalig sa mga pulitiko nga magbuhat kunohay og skate park ang Dakbayan sa Sugbo.
Pahulagway diri, pahulagway didto atubangan sa media unya dunay desinyo sa skate park nga pagatukoron kunohay ug aduna na usay lugar kon asa kini ibutang. Kini pahalipay o tugbang sa dungog nga natampo ni Didal sa Sugbo.
Pero por Diyos por Santo, hangtod karon ang saad nagpabilin nga saad ug ang mga damgo nga alang unta sa kabatan-unan daw nahilis sa panumdoman.
Taphaw ra diay kadtong tanan, nga sa mga pulitiko gipahimuslan ug ambot duna pa ba kahay makaasikaso niini aron mahatagan unta kini og katumanan.
Duna pa man tuoy kahigayunan, hinaot nga dili lang unta kini nila ilubong sa kalimot.