Sikyu nga giakusahang nangawat gipanalipdan

Sikyu nga giakusahang nangawat gipanalipdan

Gipanalipdan sa tag-iya sa RRR Security Agency ang ilang gwardiya nga gipasanginlan nga nangawat sulod sa usa ka subdivision sa Brgy. Pitalo, lungsod sa San Fernando, habagatang Sugbo.

Si Rogelio Romero, tag-iya sa RRR Security Agency nga nahinabi sa dySS Super Radyo Cebu, nagkanayon nga buotan si Jonas Canque, 35, dili badlungon.

Sumala pa niya nga dugay na nga nag-alagad kaniya si Canque, taga Brgy. Langtad, dakbayan sa Naga.

Wa kini bati nga record sukad kini nag-alagad kanila.

Gani dihang gipahibalo siya sa ilang head guard, nakugang siya.

Gipasaligan niya si Canque nga abagan sa pinansiyal nga panginahanglan ug hatagan og abogado nga makapanalipod kaniya.

Iyahang estoryahon si Canque kabahin sa akusasyon nga siya nangawat ug “gi-frame up.”

Si Canque nga nahinabi pag-usab sa Superbalita Cebu subling nipadayag nga siya “gi-frame up.”

Limpiyo iyang konsensiya sa pasangil nga siya nanglungkab sa balay ni Antonio Camasuta, 45, negusyante, taga Casamira South, Brgy. Pitalo, lungsod sa San Fernando.

Nawad-an si Camasuta og mga gadget ug mahalon nga mga relo nga mobalor ang tanan og kapin sa P500,000.

Gipadayag niya nga duna siyay mga kauban nga makatestigos nga duty siya niadtong Miyerkules sa kaadlawon.

Si Canque giingong nailhan human nahabilin ang iyang identification (ID) card sa balay ni Camasuta.

Positibo usab siyang giila sa kaabag ni Camasuta nga giingong akto nga nakakita sa iyang pagbiya.

Apan si Canque niingon nga dugay nang nawagtang ang iyang ID ug iyang nasultihan lang niini ang ilang head guard.

‘BUSLOT’

Apan si Police Major Peter Naboye, hepe sa San Fernando Police Station nga nahinabi sa Superbalita Cebu, nagkanayon nga dunay daghang mga buslot ang pamahayag sa suspek dihang ilang nadakpan.

Gipadayag niya nga “alibi” lang sa gwardiya nga siya gi-frame up.

Sumala ni Naboye nga lig-on ang mga ebidensiya nga ilang gikuptan batok ni Canque.

Wala pa mabawi ang nangahanaw nga mga butang.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph