Barangay konsehal ug iyang higala nangamatay human nabangga ang ilang gisakyang motorsiklo sa punoan sa Acasia sa alas 10:35 sa buntag sa Sabado, Pebrero 25, 2023 sa Transcentral Highway (TCH), Brgy. Cansomoroy, lungsod sa Balamban.
Ang motorsiklo giingong nawad-an og brake samtang nagdulhog sa highway nga taas kaayo og dulhugon.
Ang mga biktima giilang sila si barangay konsehal Mark Harvey T. Son, usab usa ka call center agent, taga Zone 2, Purok Akasia, Brgy. Biasong, dakbayan sa Talisay ug si Rex Leo Mahusay Luste, hingkod, call center agent, taga Brgy. Aliwanay, lungsod sa Balamban.
Si Police Lt. Col. Glenn Hife, hepe sa Balamban Police Station nga nahinabi sa Superbalita Cebu, nagkanayon nga gitawgan sila sa usa ka barangay konsehal sa Cansomoroy.
Sa pag-abot sa mga personnel sa Balamban Police Station, ilang naabtan ang mga biktima, nga gidali sa pagdala sa mga sakop sa Balamban Rescue Unit personnel sa Balamban Provincial Hospital.
Apan ang mga biktima gideklarar sa mga doktor nga patay nang niabot.
Si Hife niingon nga ang mga biktima gikan dakbayan sa Sugbo paingon sa kinapusoran sa Balamban.
“Naratol daw ning driver si Mark. Maoy ingon sa nakasaksi. Didto pa sa ibabaw haybol na, nawad-ag brake ang motorsiklo,” dugang ni Hife.
Tungod kay nawad-an na og control ang driver sa manubela sa motorsiklo nga wa nay brake, wa na nakabawi si Son, nabangga sila sa punoan sa Acacia.
Sa kakusog sa impact, nakaangkon og grabing kadaot sa ilang mga ulo ug kalawasan ang mga biktima hinungdan sa ilang kamatayon.
Si Hife niingon nga delikado kaayo ang maong karsada tungod sa kataas sa kurbada ug dulhugon kaayo.
Sumala pa niya nga daghan nang nadisgrasya sa lugar.
Giawhag niya kadtong mga motorista nga mag-amping sa ilang pagmaniho og sakyanan samtang moagi sa dapit.
Ang highway sa habig sa Cansomoroy nadisgrasyahan na sa daghang mga sakyanan nga nisangko sa kamatayon sa mga biktima.