Duha ka groundbreaking ceremonies ang tambongan ni Presidente Ferdinand “Bongbong” Marcos Jr. sa dakbayan sa Sugbo karong adlawa, Pebrero 27, 2023.
Ug kini ang unang pagbisita sa Presidente sa Sugbo sukad midaog sa pagka presidente sa Mayo 2022 nga kinatibuk-ang eleksyon.
Una sa itinerary ni Presidente Marcos mao ang groundbreaking sa unang package sa dugay nang gipaabot nga Cebu Bus Rapid Transit (CBRT) project sa Fuente Osmeña Circle sa alas 10 sa buntag.
Ang P17-bilyon nga CBRT maoy labing unang mass transport system nga tukoron sa dakbayan sa Sugbo aron sulayan ug sulbaron ang nagkagrabeng sitwasyon sa trapiko.
Ang pagtukod sa orihinal nga gitakda nga magsugod sa 2016, apan nalangan sa daghang higayon tungod sa daghang mga isyu nga naglakip sa right-of-way sa dalan, mga pagbag-o sa desinyo ug mga ruta.
SCUD PROJECT
Alas 11 sa buntag, si Marcos mopaingon sa South Road Properties alang sa groundbreaking sa Phase 1 sa Cebu City Government’s South Coastal Urban Development (Scud) project, nga naglakip sa medium-rise buildings (MRBs) alang sa mga pamilya nga namakwit tungod sa paghawan sa Siyudad sa mga istraktura nga gitukod sulod sa tulo ka metros nga easement sa walo ka dagkong agianan sa tubig.
Ang Siyudad nakigtambayayong sa Department of Human Settlements and Urban Development (DHSUD) alang sa Scud project.
Ang Phase 1 sa Scud project naglangkob sa 30 ka ektarya sa 60 ka ektarya nga luna, matod ni Cerwin Eviota, ang special assistant ni Mayor Michael Rama sa komunikasyon.
Lima ka ektarya ang ugmaron ubos sa DHSUD, samtang ang nahabilin nga 25 ka ektarya ubos sa Cebu City Government.
Matud ni Eviota, 20 ka andana nga tag-as nga mga building nga adunay 8,000 ka mga unit, ang tukoron ubos sa Phase 1.
Ang mga MRB, matud niya, upat ngadto sa lima ka andana nga adunay labing minos 100 ka units matag usa.
Ang Scud project mao ang sanga sa memorandum of understanding nga gipirmahan niadtong Nobiyembre 2022 tali sa Siyudad ug sa DHSUD nga magtukod og 30,000 ka housing units isip kabahin sa programa sa nasudnong kagamhanan sa pagsulbad sa backlog sa pabalay, ang Cebu City Public Information Office (PIO) mitaho.
Ang PIO nitaho nga si DHSUD Undersecretary Garry de Guzman niingon nga ang matag housing unit mokantidad og dul-an sa P1.15 milyunes. Uban sa 30,000 ka units nga mahimo, ang suporta sa DHSUD mobalor og P33.45 bilyunes.
Ubos sa kasamtangan nga market rate nga unom ka porsyento nga interes, ang mga benepisyaryo sa pabalay mobayad og mga P6,500 matag buwan sulod sa 30 ka tuig aron makapanag-iya sa ilang unit.
Apan tungod sa subsidy sa nasudnong kagamhanan, ang interest rate mous-os na lang sa usa ka porsyento, nga magdala sa ilang binuwan nga amortization ngadto sa P3,500 na lang.
Sa hapon, pangunahan ni Presidente Marcos ang pag-apud-apod sa cash aid sa Mandaue City Sports and Cultural Complex.