Diputado: Kalainan sa protocol ni PBBM, kanhi PRRD

Diputado: Kalainan sa protocol ni PBBM, kanhi PRRD

Taas ang linya niadtong buntag sa Lunes, Pebrero 27, 2023, sa gusto magpakuha og antigen test para mahimo na sila makaduol ni Presidente Ferdinand ‘Bongbong’ Marcos Jr. (BBM) atol sa paglusad sa Kadiwa ng Pangulo atubangan sa Kapitolyo.

Apil na niini ang gusto mosulod sa Mandaue City Sports Complex sa pagka hapon sa samang adlaw.

Apan tungod sa kaapiki sa panahon, gamay lang ang nakuhaan og antigen test samtang ang uban, mipadaplin na lang.

Kadtong nakuhaan unya nag-negative, gibutangan og puti nga wrist-band timailhan nga mahimo na sila makapaduol ni BBM.

Tuod man, andam na unta ang naka-antigen nga mopaduol ni BBM.

Ang naka-porke kay mismo didto sa lugar nga anhaan ni BBM, nagdasok na man ang mga tawo.

Tungod sa kadaghan sa mga tawo, wa na nakalugar pa ang Presidential Security Group (PSG) nga hilngon o susihon tagsa-tagsa ang adunay puti nga wrist band.

Ang resulta, wala na mapahimusli pa ang puti nga wrist band kay wa na man ma-kontrol ang nagdasok nga katawhan sa lugar diin gihimo ang Kadiwa ng Pangulo.

* * *

Kon ikomparar ang seguradad o pamaagi sa PSG karong panahon ni BBM ug kadtong panahon ni kanhi Presidente Rodrigo Roa Duterte (PRRD), dako kaayo og kalainan.

Medyo luag ug dili kaayo istrikto ang PSG karon kon ikomparar sa panahon ni PRRD.

Sa panahon ni PRRD, kontrolado sa PSG ang tanang kalihukan nga anaa si PRRD ug makita nimo nga walay gi-santo ang PSG kon seguridad na ang hisgotan nga bisan gani ang mga politiko, sayon ra kaayo nila nga ipadaplin.

Apan karon, sama sa kulang o walay kontrol ang PSG sa kalihukan ni BBM tungod kay adunay “taga-Malakanyang” nga mo-review sa gusto ipatuman sa PSG. Gani, matud sa usa ka source, sama sa mas gamhanan pa ang mga taga-Malakanyang kay sa PSG kon adunay kalihukan si BBM.

Gahapon, dihay usa ka exhibitor nga nitunol og sampol nga tsokolate ngadto kang BBM aron iya kining matilawan. Ug tuod man, miinom sab og gamay si BBM.

Susmariosep.

Asa na man ang food taster sa Presidente? Nakapangutana ang source.

Dili unta kini angay mahitabo kay delikado ang seguridad sa Presidente og mahimo nga madaot siya sa iyang giinom apan sama sa wala mabantayi sa PSG ang pagdawat ug pag-inom ni BBM sa maong imnonon.

Maayo na lang nga luwas ang maong imnonon ug wala maunsa si BBM.

Nakapang-hesus ang usa ka ASec nga nakakita sa pag-inom ni BBM sa sampol nga tsokolate ug matod pa, dili gyod kadto mahimo sa panahon pa ni PRRD.

* * *

Gawas sa luag ug dili istrikto ang PSG, makita sab nga walay gibasa o kodigo si BBM samtang naghimo sa iyang mensahe ngadto sa katawhan ug diretso ang iyang pagsulti sa iyang gusto buhaton.

Sa panahon ni PRRD, adunay kodigo bisan pa kon dili kini basahon tanan tungod kay mahilig mag-adlib si PRRD.

Gani way klaro nga program ang maong kalihukan og sa wala pa mo-mensahi si BBM, gi-welcome ug gi-introduce siya ni Gov. Gwendolyn Garcia.

Sa panahon ni PRRD, usa ka sentence lang ang pagpaila sa Presidente apan karon, nakahimo pa si Gov. Garcia paghatag og mensahe usa pa niya gipailaila si PBBM.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph