DILI ihatag isip reward ngadto sa mga assets ug informants ang masakmit nga mga ilegal nga druga atol sa operasyon sa Philippine Drugs Enforcement Agency (PDEA) ug kapulisan sa Soccsksargen.
Kini maoy giklaro ni Philippine Drug Enforcement Agency (PDEA)-Soccsksargen Acting Chief Admin ug Spokesperson Katryn Gaye Abad tungod sa giingon nga 30 porsiyento sa mga nasakmit nga druga sa anti-illegal drugs operations ihatag isip reward ngadto sa informant o asset.
Matud ni Abad nga ang PDEA adunay reward system ubos sa Operation Private Eye ug Operation Law Men diin kadtong makahatag og impormasyon nga moresulta sa malampuson nga operasyon hatagan og ganti nga moabot og P2 milyones depende sa gidak-on sa anti-illegal drug operation.
Gipanghimakak sa opisyal nga dunay "recycle" sa mga nakumpiska nga druga sa Soccsksargen.
Hinuon, gipatin-aw ni Abad nga mga nakumpiska nga mga ilegal nga druga dauban kini sa thermal facility base sa mando sa korte.