Nakahinumdom pa ba mo sa American acoustic pop-rock nga “Stephen Speaks” nga nagpasikat sa kantang “Passenger Seat” niadtong 2003?
Si Rockwell Ryan Ripperger nga founder ug vocalist-songwriter sa maong banda nihimo og surprisang pagbisita sa Manila branch sa Cebu’s Original Lechon Belly (Colb) nga nagsaulog sa ilang 11th Anniversary niadtong Pebrero 25.
“I wanna thank Cebu’s Original Lechon. I’m so excited to have lechon. We also have it in Oklahoma but we just don’t do it the same as you guys do it here,” matud pa sa Oklahoma, USA-born singer nga nag-viral karong bag-o tungod sa iyang post bahin sa Grab driver nga hapit gitiketan tungod sa traffic violation apan human giingong nakig-selfie ang enforcer niya, gipasaylo na lang.
Apan esplika sa iconic singer nga nakita sa dashcam nga inosente gyud ang driver sa maong kalapasan mao nga giabsuwelto.
Si Ripperger nag-mall tour sa Manila niadtong Pebrero aron i-promote ang iyang bag-ong single nga “Tryna Prove” nga nagsilbing reunion nila ni TJ McCloud, ang kanhi co-founding member sa Stephen Speaks ug co-writer-vocalist niya sa “Passenger Seat.”
Sama sa miaging mga anibersaryo sa Colb, star-studded gihapon ang ilang selebrasyon nga gipangulohan nilang Ethel Booba, Boobsie Wonderland, Boobay, Kitkat ug Richard Yap nga nipadangat og video greeting sa ilang social media.
Ang komedyanteng si Boobsie ang nagsilbing host sa ilang Annual Spicy Boneless Lechon Eating Contest samtang si Boobay ni-greet atol sa ilang top-rating Sunday TV late night show nga “The Boobay and Tekla Show” sa GMA-7.
Nihatag og dugang kasadya sa okasyon ang presensya sa mga modelo sa Admire Models Philippines (AMP) isip Colb ambassadors nga nirampa sa ilang mga sangang tindahan sa Mactan Airport, Super Metro LapuLapu, SM City Cebu ug Park Mall.
Ang AMP gipanag-iya sa sikat nga Cebuano fashion designer nga si Dexter Alazas kinsa maoy executive producer sa gikahinamang “Search for Ginoong Pilipinas 2023” nga ipahigayon karong Mayo sa Sugbo diin duha sa mga major international titles nga ilogan ang “Mr. Universe Tourism” ug “Man of the Year.”
Ang magtiayong Marlon ug Gladys Gochan nagpasalamat sa tanang niduyog sa ilang selebrasyon labi na sa mga loyal customer, partners, mga higala ug mga empleyado nga bisan sa pandemya naa gihapon silang nagpaluyo.
“Our faith, our trust on each other, and our commitment to the company are those factors which brought us to the place where we are right now,” ni Marlon ug Gladys nga maoy nanag-iya ug innovators sa original boneless lechon sukad pa niadtong 2012.