Daghang mga proyekto sa Sugbo ang pagasugdan na sa dili madugay. Karong bag-o, nitambong si Presidente Ferdinand “Bongbong” Marcos (PBBM) sa groundbreaking sa Cebu Bus Rapid Transit (CBRT) phase 1 nga bag-ong mass transit system. Diha usay groundbreaking ceremony alang sa first phase Cebu City’s Pambansang Pabahay sa Pilipino Housing (4PH) nga katumanan usab sa saad ni PBBM nga magtukod og usa ka million ka balay matag tuig.
Gipahibawo usab ni Cebu City Mayor Mike Rama nga adunay walo ka mga taytayan nga tukoron sa may South Road Properties (SRP) nga gipangitaan pa og pundo sa Department of Public Works and Highways (DPWH). Lain usab nga plano sa DPWH mao pagtukod og boulevard sa SRP nga sama kalapad sa Osmena Boulvevard. Ang tunga niini mahimong butangan og monorail. Nakapirma na usab ang Cebu City og Joint Venture Agreement (JVA) sa Expedition Construction Corporation (ECC) sa paghimo sa Pond A nga usa ka world-class business center.
Samtang daghang mga proyekto sa Lapu-Lapu City nga hangtud karon wa pa kasugdi. Una niini mao ang reclamation duol sa Mactan-Cebu International Airport (MCIA). Kining maong plano sa pag-reclaim niadto pang administrasyon ni kanhi mayor Pax Radaza. Diha na gani kadtoy gidungog nga maoy mogasto sa maong reclamation project.
Karon, suma sa akong tinubdan nga gilihok na usab kini ni Lapu-Lapu City Mayor Junard “Ahong” Chan. Ang laing dako’ng proyekto mao ang skyway nga magsumpay sa ikatulong taytayan (CCLEX) hangtud sa MCIA. Una nang gipahibawo sa LLEX, sister company sa CCLEX, nga sila maoy motrabaho niining maong skyway nga ilang gibanabanang mokostar og P24.8 billion. Apan sa takulahaw lamang gipahibawo sa Chan administration nga Chinese construction firm ang motukod sa maong skyway. Murag naproblema ang maong proyekto tungod sa kadaghang barangay nga maapektuhan sa agian niini.
Ang klaro lang nga masugdan sunod tuig mao ang 4th bridge nga magdugtong sa Mandaue City ug Lapu-Lapu City. Ang unang design niini gisupak ni Mayor Chan ug sa ubang mga negusyante apan nasulbad ra ang ilang concern sa dihang miuyon ang Department of Public Works and Highways (DPWH) nga magtukod og coastal road gikan sa tiilan sa 1st bridge hangtud nga masumpay kini sa 4th bridge. Lain ang bidding alang niini ug sa bridge diin mokostar og P76.4 billion. Gikatakdang sugdan ang construction niini sa 2024 ug mahuman sud sa lima ka tuig. (mannyrabacal1144@gmail.com)