Gihimakak sa usa ka mining processing firm sa lungsod sa Alcoy, Cebu ang mga pasangil kabahin sa giingong wala pagbayad niini og buhis sa Kagamhaman sa Probinsya sa Sugbo.
Sa giluwatang pamahayag sa Philippine Mining Service Corporation (PMSC) niadtong Marso 1, 2023, nagtuo sila nga wala sila nakalapas sa balaod bisan pa og gimanduan sila sa Kapitolyo pagpahunong sa ilang operasyon sa miaging buwan.
“It is highly regretful that Philippine Mining Service Corporation (PMSC) was issued the Executive Order directing it to cease and desist from processing, selling, and transporting dolomite due its alleged violation of local tax laws and regulations and environmental laws,” tipik sa pamahayag sa PMSC.
Ang kompletong kopya sa pamahayag sa PMSC nabutang sa ilang official website.
Gitumbok sa PMSC mao ang Executive Order No. 7 ni Garcia niadtong 2020 kalabot sa pagpahunong sa ilang operasyon tungod sa kontrobersiyal nga pagbungkag og dolomite sa Manila Bay white-sand beach.
Kahinumdoman nga duha ka mga tuig na ang nakalabay, nasayran nga ang dolomite nga gigamit sa Manila Bay nagagikan pa sa lungsod sa Alcoy diin dali nga nihimo og imbestigasyon ang Kapitolyo kalabot niini.
Sa nasayran, duha ka mining firms ang kinahanglan nga motuman sa environmental ug tax laws. Gipahunong ang operasyon sa PMSC ug Dolomite Mining Corp. tungod sa gipahigayong imbestigasyon.
Matud sa mga kompaniya nga nadawat na nila ang pasiunang tax assessments sa Kapitolyo sa 2020 apan gi-contest kini nila sa korte ug kasamtangang nagpadayon ang hearings kalabot niini.
“PMSC filed an extremely urgent motion for a Temporary Restraining Order (TRO) and an application for a writ of preliminary injunction since as far as it is concerned, PMSC is not and cannot be legally considered as delinquent under the law as the tax assessments were duly and timely protested and are still pending with the RTC (Regional Trial Court),” pamahayag sa PMSC.
Gipasabot sa PMSC nga wala sila’y nahimong kalapasan sanglit gitugotan man sila sa Nasudnong Kagamhanan sa pag-operate sa lugar niadtong 2020.
Kahinumdoman nga ang Kapitolyo una nang nimando sa PMSC sa pagbayad sa 10 porsiyentong buhis base sa local fair market value sa matag cubic meter sa tanang ordinaryong mga bato, balas, graba ug uban pang quarry resources nga ilang gikuha sa territorial jurisdiction sa Probinsya sa Sugbo.