Basin nakadungog ka na sa lungsod sa Pamplona human sa nahitabong pagpatay kang Negros Oriental Governor Roel Degamo.
Nakasuroy mi sa mao nga dapit dihang nangapil mi sa akong asawa sa Cebu-Negros Loop niadtong katapusang semana sa Nobiyembre sa miaging tuig. Sama sa Transcentral Highway sa Cebu, maanindot ang mao nga dan, tungason ang daghang mga bahin sa karsada, apan lapad.
Maanindot kaayo ang palibot kay gamay pa ang mga balay, maihap lang ang mangagi nga mga sakyanan ug daghan sa agianan nga malantaw ang kabukiran ug kapatagan.
Sagad sa parte sa karsada nindot kaayo, sementado. Bugnaw kaayo ang hangin nga mosapigad sa imong panit.
Kadaghanan sa mosaka sa mao nga karsada mga nagmotorsiklo o nag four-wheeled og mga sakyanan kay duna may nindot nga kan-anan sa dapit nga mao ang Alicia Cafe.
Alang nako, kadtong anad nang mosaka sa TCH nga magbiseklita kaya ra kaayo ning sak-on, either mag MTB o road bike. Dunay portions nga taas ang sakaon ug titip sab, apan kon anad ka na sa TCH, kaya ra.
MAGBAWON LANG
Tungod kay mingaw pa ang karsada, nihit pa ang mga balay ug tindahan, mas maayo nga magdala og tubig nga igo-igong mainom sa biyahe.
Mas maayo usab nga daghan ang manungas tungod kay medyo layo ang dapit ug minos ra ang mga namuyo ug mga sakyanan nga mag-agian.
Apan ang karsada sagad hamis kaayo. Ang challenging kaayo mao ang katungason ug ka layo sa dapit. Di sab kabayran ang imong masinati sa agianan hangtod na sa cafe tungod kay maanindot ang mga talan-awon. Alang nako, mas maanindot pa sa TCH.
Ambot basin gibag-ohan lang ko.
Ang nakaanindot sa dapit gud, di pa kini crowded, di sama sa atoang TCH nga kuyaw nang suroyan kay gawas nga daghan kaayong hambogero nga riders, uban kanila reckless pa, daghan na kaayo ang sakyanang mangagi.
Sa karsada sa Pamplona, nihit pa ang mangagi. Di hinuon kakompyansahan kay duna say mga drayber nga nagsalig nga mingaw, kusog kaayong makapadagan.
BACK-UP
Kon taga Cebu ka, mas maayo tingali nga dunay back-up nga sakyanan kon mag group ride. Di baya matag-an ang mga hitabo nga tungod sa ka layo sa dapit, dunay mabikugan o mahutdan og kusog.
Apan niadtong mga biker nga kusgan na ug hilig og bike packing, haom kaayo ang dapit. Mahimo rang mag camp sa daplin sa karsada kay dunay mga dapit nga hawan kaayo. Mas nindot ang hinay nga pagbiyahe kay mas ma-appreciate ang kaanindot sa dapit.
Sa kadtong di kaayo anad, haom usab ang back-up nga sakyanan, sama niadtong among gibuhat sa amoang Samboan ride gikan sa Capitol gamit lang ang among folding bikes.
Di sab makompleto ang ride sa usa lang ka adlaw kay sa experience pa lang daan, nindot na kaayong tagamtamon ang mga talan-awon ug kabugnaw sa dapit. Maanindot kaayong puy-an bisan sa makadiyot.
Taliwa sa bayolenteng mga hitabo sa Negros Oriental, ang lugar luwas gihapon niadtong mga mobisita.