Nakamugna og kasikas sa mga netizen ang tweet ni Thirdy Ravena sa iyang Twitter account nga nagpasumbingay kalabot sa duha ka mga team sa PBA nga yano ra’ng gipangkulata sa pagsugod sa East Asia Super League (EASL) sa Utsunomiya, Japan.
Niadtong Huwebes, ang San Miguel Beer way kaluoy nga gilampornas sa Ryukyu Golden Kings, 96-68, sa Nikkan Arena.
Way departamento nga gidag-an ang Beermen ilabi na kay na-injured ang ilang numero unong pambato nga si June Mar Fajardo.
Daw sa giduwaduwaan lang ang San Miguel sa team sa Japan B. League nga naglakip sa batan-ong Sugboanon nga si Carl Tamayo ug sa kanhi PBA import nga si Allen Durham.
Usa ka adlaw sa wa pa kulataha ang Beermen, laing PBA team nga mao ang Tropang Giga gilubong usab og taga liog sa Japan B. League champion Utsunomiya Brex, 99-66.
Gumikan niining kapakyasan nga natagamtam sa duha ka PBA teams, wa kalikayi ang mga negatibong komento sa mga netizen diha sa social media.
Ok lang siguro og mapildi basta dili lang lubong kay kon basketball na gani ang hisgutan, ilabi na sa East Asia nations, ang Pilipinas naila sa pagkadominanti.
Kita gud ang unang nakatukod og professional basketball league sa Asia.
Pero karon puwerte nang pagka baliha kay mora na man tag gihimong punching bag sa ubang mga nasod.
Sa iyang twitter account, si Third Ravena nagkanayon nga “and they thought playing here was easy...(duna pay emoji nga nagkatawa).
Kon imong tan-awon, mora og ang gitumong ni Thirdy niini mao ang mga PBA teams o mga player sa duha ka teams sa PBA nga gikastigo.
Kini gud si Thirdy, atoa ni magbasihan sa Japan isip import sa San-En NeoPhoenix sa B. League.
Ang maong twitt nakakuha og managlahing reaksiyon gikan sa mga fans. Usa sa mga mi-react usab niini mao si Chris Ross, ang beteranong guard sa San Miguel nga mora og naigo ug gisakitan sa gi-tweet ni Thirdy.
“No need to bring anyone down. You have no clue what’s goin on over here bro, chill,” tubag sa 37-anyos nga Ross.
Pero daling midepensa si Thirdy ug nipasabot nga dili para sa mga player o bisan gani sa team ang iyang gi tweet.
Gitumong diay niya niini ang mga fans o haters nga perming motira kaniya ug sa iyang igsuon nga si Kiefer.
Kini gung Ravena brothers perming i-bash sa mga netizen kay lagi perming malakip sa Gilas Pilipinas lineup bisag way ayong gipakita. Palakasay ra kuno.
Di ko kabasol ni Chris Ross nga naka-react sa tweet ni Thirdy kay mao may iyang pagsabot niini.
Pero para nako kon dunay angay i-sentro sa pagbasol, way lain kon dili ang PBA.
Nganong magpadala man ta og team nga dili sakto sa preparasyon ug dili pinili ang molangkob niini? Super League ug usa ka international competition ang gisalmotan, unya dili nato seryusohon ang pagsalmot.
Tan-awa di ba international sab ang pagpakauwaw nga ilang gihimo sa atong nasod?
Unya dayon ra bag pasiatab nga hatagan nilag prayoridad ang kadungganan sa nasod. Istoriyaheee!