Babayeng negusyante nga gipasakaan og mga kasong estafa sa laing negusyante sa managlahing mga dapit sa Sugbo, nakaangkon og laing mga kadaugan sa hukmanan.
Sa dakbayan sa Lapu-Lapu, gibasura ni Branch 73 Presiding Judge Ronald Tolentino sa Regional Trial Court (RTC) sa dakbayan sa Lapu-Lapu ang kasong estafa nga gipasaka batok kang Michelle Lim Go-Chu ug sa magtiayong Lorenzo Baltonado Jr. ug Jerlyn Joyce Baltonado ni property developer Kaiser Christopher Tan kay way nakitang ebidensya ang korte nga magmatuod sa iyang mga alegasyon.
Si Go-Chu giila ni Tan nga "intermediary" sa iyang pagpautang sa magtiayon.
Ang kaso gihuptan kanhi ni Lapu-Lapu City RTC Branch 58 Presiding Judge Ferdinand Collantes apan siya ni-inhibit niadtong Pebrero 7, 2023 sa paghusay human sa giduso nga motion for inhibition ni Go busa nabalhin ang husay sa korte ni Tolentino human sa raffle.
Sa iyang pito ka pahina nga desisyon nga gipakanaug niadtong Pebrero 27, 2023, si Tolentino niingon nga sila si Go ug ang magtiayong Baltonado di mahimong makasohan og estafa base sa pag-isyu og tulo ka mga tseke nga mibalor tanan og P10,280,000.
Matud ni Tolentino, di mahimong maakusahan og estafa ang mga akusado kay way bisan usa nga napakitang "contracted obligation" si Tan.
Ikaduha, mahimo lang ang estafa kon dunay malice ug dunay tumong sa pagpangilad ang mga akusado.
"There can be no estafa if the accused acted in good faith because good faith negates malice and deceit," mabasa sa hukom.
Ning mao nga kaso, base sa records sa korte, ang mga Baltonado niduso og petisyon sa korte sa Dakbayan sa Ormoc alang sa financial rehabilitation sa ilang mga kompaniya, diin sila niingon nga ang tanang "claims" magpabilin apan ang pagpatuman niini suspensuhon una.
Giila gani sa magtiayon si Tan nga usa sa mga nagpautang kanila.
Kay giila sa magtiayon nga sila utangan, kini nagwagtang sa malice ug nagpakita nga wa silay tumong sa pagpanglimbong.
Tungod sa pagbasura sa kaso, wa na kinahanglana pa ang pag-isyu og hold departure batok kang Go-Chu ug sa magtiayong Baltonado.
Samtang gibasura usab ni Toledo City RTC Branch 59 Presiding Judge Judilyn Tapia-Menchavez ang motion for reconsideration nga giduso ni Tan sa hukom nga nagsalikway sa pagluwat og warrant of arrest ug hold departure order batok kang Go-Chu.
Si Tan, pinaagi sa iyang counsel, niduso og motion for reconsideration, apan wa kini makakombinser sa korte.
"By judicious appraisal thereof, the facts alleged in the motion for reconsideration failed to convince the Court," mabasa ang tipik sa hukom nga giluwatan niadtong Pebrero 27, 2023.
Niadtong Pebrero 14, 2023, si Tapia-Menchavez nihukom sa pagsuspenso sa paghusay sa kaso busa gibawi usab ang warrant of arrest ug gisalikway ang pagluwat og hold departure batok kang Go-Chu.
Ang kaso gibalik ngadto sa Office of the City Prosecutor sa Dakbayan sa Toledo.
Apan, ang warrant of arrest ug hold departure order batok sa mga Baltonado nagpabilin sumala sa sayo nga hukom sa korte.