Nagpakatap og 40 puntos si Donovan Mitchell aron agakon ang host Cleveland Cavaliers ngadto sa overtime nga kadaugan batok sa Boston Celtics, 118-114, kagahapon, Marso 7, 2023 (PH time), sa National Basketball Association (NBA).
Naggukod og 14 puntos ang Cavaliers pagsugod sa 4th quarter, 92-78, ug ning higayuna, gibunlot ni Cavaliers coach J.B. Bickerstaff gikan sa lingkuranan si Lamar Stevens, kinsa wala nakaduwa sa nag-unang tulo ka quarters.
Gikan sa iyang pagsulod, wala’y giusik nga oras si Stevens ug gigiyahan niya ang paggukod sa Cavaliers pinaagi sa iyang makahasol nga depensa ug nakatampo sab siya og walo ka mga puntos.
“There is no way we win that game without Lamar,” batbat ni Bickerstaff. “He changed the tone, the physicality, the effort.”
Si Evan Mobley nidugang og 25 puntos ug 16 ka rebounds samtang niamot og 17 puntos si Darius Garland alang sa Cavaliers, nga ningsaka sa 7-0 nga rekord sa overtime sa 2022-23 season.
Ang Cavaliers ningsaka sa 41-26 nga rekord, ikaupat sa Eastern Conference.
Ang Celtics, nga ningkombati nga wala ang duha sa ilang mga pambato nga sila si Jayson Tatum ug Al Horford, gipangulohan ni Jaylen Brown pinaagi sa iyang 32 puntos samtang nihatag og 24 puntos si Malcolm Brogdon.
Parehong adunay angol sila si Tatum ug Horford.
Aduna unta’y duha ka mga kahigayunan ang Celtics aron angkunon ang kadaugan sa dayong pagkapupos sa oras sa regulation diin niadtong mga gutloa nagtabla ang duha ka mga kampo, 109-109.
Apan nasipyat si Grant Williams sa iyang duha ka freethrows sa nahabiling 0.8 segundos ug hasta si Marcus Smart sa iyang tip-in shot sa dayong pagtingog sa buzzer hinungdan nga napugos ang overtime.
Sa wala pa siya nasipyat, gisultihan ni Williams si Mitchell nga pasudlon niya ang iyang duha ka freethrows.
“He (Williams) gave us both, but I didn't box out Marcus Smart for the tip and that's what I'm thinking about,” matud ni Mitchell. “Thank God he missed 'em and we got the win.”
Taliwala sa kapildihan, ang Celtics nagpabilin sa ikaduhang luna sa Eastern Conference bitbit ang 45-21 nga rekord. (AP)