It’s on everybody’s lips.
Mao kini ang tubag sa kadaghanan kon pangutan-on kon kinsa kaha ang utok o mastermind sa gihimo nga masaker sa gobernador sa Negros Oriental nga si Roel Degamo kauban ang pipila ka mga opisyal sa Kapitolyo ug mga sibilyan nga diha sa iyang panimalay kaniadtong nakalabay nga Sabado.
Ang pagduda sa katawhan nakasentro sa usa ka personahe apan tak-om ang baba kon pangutan-on og kinsa tungod sa kahadlok nga maoy isunod sa mga nangamatay kanhi.
Delikado ang imong kinabuhi kon ibungat nimo ang naa sa imong huna-huna mao nga kasagaran sa pangutan-on, motubag lang nga og kinsa ang naa sa imong hunahuna, mao sab na ang ako.
* * *
Apan adunay lintunganay ang tanan.
Diha bitaw mayor sa usa ka lungsod sa Luzon nga hilabihan ka gamhanan kaniadto, mas dugay pa ang iyang pagserbisyo sa pagka mayor kon ikomparar sa nangaging mga mayor apan miabot ra gyud ang punto nga napriso ra gyod siya.
Dugay gyod siya nga gilaming sa prisohan ug didto nakat-on siya sa usa ka leksiyon sa kinabuhi, walay forever labi na gyod kon daghan ka og kontra kay nagpabadlong ka.
Mao sab kini ang anaa sa huna-huna sa daghan nga katawhan sa Negros Oriental, nga unta mahisama sa mayor ang gitumbok nga utok sa maong panghitabo.
* * *
Kompyansa ra sila kaayo.
Mao kini ang usa sa mga gilitok ni Pamplona Mayor Janice Degamo, asawa sa gipatay nga gobernador, sa dihang gipangutana siya sa media.
Dugay ra sila gipahimangnoan nga magbantay kay dunay plano sa ilang kinabuhi, labi na gyod si Governor Roel.
Gani, dihay report nga kadtong mga armas ug mga bala nga nasakmit mga pipila ka semana na ang nakalabay para kuno to nila.
Apan bisan pa sa mga taho nga ingon ani, sama sa gibale-wala lang nila kay kompiyansa sila nga dili sila mahitumpawak sa kadautan.
Ulahi na nga nasabtan nila nga aduna diay grupo sa mga tawo nga kanunay nagsunodsunod kanila aron buhaton ang pagmasaker.
Sama sa gitawag og “dead man walking” ang nahitabo tungod kay wala man nila mahibaw-i kon kanus-a moatake ang ilang mga kontra.
Mao kini ginaingon nga kon nahibaw-an pa lang nga mahitabo kini, gibutangan unta to og mga checkpoint ang highway padung ug gikan sa panimalay sa gobernador.
* * *
Matud pa sa taho, delikado sab ang panglawas sa bag-ong mihural nga gobernador sa Negros Oriental nga si Guido Reyes, nga kanhi mayor sa Guihulngan.
Dili ikalimod nga bug-at ug lisod ang trabaho sa gobernador sanglit iya man atubangon ang tanang mga problema sa Probinsiya.
Kon adunay sakit ang usa ka tawo unya dugangan pa sa mga giatubang nga problema sa trabaho isip pinaka-taas nga opisyal sa Probinsiya, mosamot ka delikado ang iyang kahimtang.
* * *
Nihimakak si Cong. Arnie Teves nga aduna siyay kalabutan sa pag-masaker ni Degamo.
Matud pa niya, wala siyay motibo nga patyon si Degamo kay dili na man siya o ang iyang igsuon mabulahan kon mamatay si Degamo kay si Bise Gobernador Guido Reyes man ang mabulahan.
Husto sab.
Kon imong hunahunaon, dili na nila mapahimuslan sa pulitika ang pagka-matay ni Degamo. Para unsa pa man kon ilang ipapatay nga wa na may kapuslanan sa politika, matud pa.
Unsa kahay reaksiyon sa katawhan niining gipamulong ni Cong. Teves?
* * *
Kining mga nanghitabo karon nagpakita lang kini sa dakong problema sa peace and order.
Unsaon nato pagkombinsir ang mga turista nga moanhi sa atong nasod o sa mga negusyante nga mo-negusyo kon lima singko ang kamatay dinhi?