Gimando na ni Cebu Governor Gwendolyn Garcia ang pag-isolate sa tibuok dakbayan sa Carcar pinaagi sa pagpatuman sa estriktong border control alang sa mga baboy ug mga produkto niini sa siyudad tungod sa positibong mga kaso sa African Swine Fever (ASF).
Kini gipahibawo ni Garcia atol sa pakighinabi sa mga tigbalita sa Martes, Marso 7, 2023 subay sa iyang pag-confirm usab nga anaa na ang maong sakit sa mga baboy sa Sugbo sa Marso 7, 2023.
“...that is the reason why we are now implementing very, very strict controls. We have isolated Carcar and we have warned all other LGUs. I know that at least in the Province of Cebu our mayors will cooperate with us and this is yet another challenge together with myself as governor will face but I promise you we will prevail,” matud ni Garcia sa Marso 7, 2023.
Subay niini, gipugngan una ang pagpamaligya og lechon gawas sa siyudad, apan gitugot ang pagbaligya sa mga chicharon nga daan nang nahimo o old stocks.
Sa ipatuman nga border control, gipahibawo niya nga iyang gimandoan ang kapulisan sa pag-set up na og checkpoint areas pagsiguro nga walay makagawas nga baboy sa Carcar paingon sa ubang bahin sa probinsya.
Ang mga silingang mga lungsod ug siyudad gialerto usab ni Garcia sa estriktong pag monitor sa ilang mga baboy ilabi na sa dakbayan sa Talisay nga ilado usab sa ilang lechon.
CONTACT TRACING
Gipahibawo ni Assistant Secretary Salvador Diputado sa Department of Agriculture sa Martes, Marso 7, nga nilusad og contact tracing ang ilang personnel uban sa mga kawani sa Bureau of Animal Industry (BAI) aron masuta ang gigikanan sa baboy nga nagpositibo sa African Swine Fever (ASF) sa dakbayan sa Carcar.
Ang mga personnel gikan sa BAI sa Manila tuyo nga mianhi dinhi sa Sugbo aron matabangan nga dili na makakatap ang ASF ngadto sa ubang lugar.