PERTENG lipaya sa mga kasambahay dihang nakadawat sila og ayuda gikan sa Office of First Congressional District Representative sa Davao City atol sa Kasambahay Day sa Department of Labor and Employment (DOLE) sa SM Annex sa Ecoland, Marso 5, 2023.
Anaa sa 200 ka mga kasambahay ang nakadawat og mga souvenirs ug cash aid gikan kang First Congressional District Representative Paolo "Pulong" Duterte.
Gipangunahan ang programa sa anak ni Pulong nga si Rodrigo "Rigo" Duterte II diin ang mga kit backpacks gipang-apud-apod lakip na mga reusable tote bags, ingon man ang salapi.
Ang magbabalaod nipadayag sa iyang pasalamat sa DOLE–Davao Region, Department of Education (DepEd), Philippine Health Insurance Corporation (PhilHealth), Pag-Ibig Fund, ug Social Security System (SSS) sa ilang panaghiusa ug pagtrabaho niining maong programa nga para sa mga housemaids.
"Kon tan-aw sa uban tao sayon lang ang trabaho sa atong mga kasambahay, ako nasayud nga dili kani tinuod," tipik sa hamubo nga pamulong ni Rigo.
Daghang butang ang gisakripisyo sa maong mga kasambahay, lakip na ang ilang mga minahal sa kinabuhi, aron lang mahimong epektibong kasambahay sa panimalay sa laing tawo. Dugang pa niya nga ang uban nakasinati og pisikal nga pag-abuso gikan sa ubang mga amo atol sa ilang pagpanarbaho.
"Busa sakto lang nga tagaan sila og pagtagad ug ihanyag ang tagsa-tagsa ka mga prebilihiyo ug katungod alang kanila," dugang sa batan-ong Duterte.
Ang Kasambahay Fun Day gisalmotan sa mga housemaids nga na-enrol sa Alternative Learning System–Accreditation and Equivalency (ALS–A&E) sa Department of Education (DepEd). Gawas sa mga diskusyon, gipakita usab sa mga nanambong ang ilang talento sa pagkanta ug pagsayaw.
Matud pa ni DOLE-Davao assistant regional director ug abogado Jason P. Balais, ang maong aktibidad maoy ilang pasidungog sa tanang mga kasambahay sa panimalay nga nagkugi pag-ayo aron maseguro ang kalidad nga serbisyo sa ilang mga amo. Dugang pa niya nga ang mga housemaids kanunay nga kabahin sa matag kalampusan sa imong mga agalon.