Gipasaka sa Criminal Investigation and Detection Group (CIDG) ang tulo ka mga reklamo sa pagpatay batok kang Negros Oriental Third District Representative Arnolfo Teves Jr. ug lima pa kalabot sa pagpatay sa tulo ka indibidwal niadtong 2019.
Kasong pagpatay ang gipasaka batok kang Teves; alyas Hannah Mae, iyang sekretarya; Richard Cuadra, alyas “Boy Cuadra”; Jasper Tanasan, alyas “Bobong Tanasan”; Rolando Pinili, alyas “Inday”; ug Alex Mayagma atubangan sa Department of Justice sa Manila sa Martes, Marso 7, 2023.
Si CIDG Director Brigadier General Romeo Caramat Jr. niingon nga base sa mga pamahayag sa mga testigo nga ang mga respondent “direkta” nga nalambigit sa pagpatay nila ni Miguel Dungog, Lester “Tom-Tom” Bato, ug Pacito Libron. Ang mga pagpatay giingong nahitabo niadtong 2019.
Si Dungog, kanhi presidente sa Philippine Councilor’s League sa Negros Oriental, gipusil-patay sulod sa compound sa Siliman University Medical Center niadtong Marso 25, 2019.
Si Bato gipatay niadtong Mayo 26, 2019 sa Sitio Labugon, Barangay Nagbo-alao, Basay, Negros Oriental, samtang si Libron gipatay sa Barangay Malabugas sa Bayawan City niadtong Hunyo 23 sa samang tuig.
Si Caramat niingon nga sila si Cuadra ug Mayagma parehong dunay standing warrant of arrest sa kasong murder.
Ang pagpasaka og kaso batok kang Teves nahitabo human sa pagpatay kang Negros Oriental Governor Roel Degamo sa Sabado, Marso 4, 2023.
Sa sayo pa gisalikway ni Teves ang mga hungihong nga naglambigit kaniya sa kamatayon ni Degamo. (SunStar Philippines)