Karong tuiga, ubos sa pamunoan ni Presidente Ferdinand “Bongbong” Marcos, daghan nang mga pulitiko nga giatake ug gi-ambush sa nagkalainlaing dapit. Ang uban kanila nangamatay samtang ang uban grabeng nangaangol.
Una niini mao ang pag-ambush patay kang village chairman Ali Manangca ug lima niya ka mga kuyog sa Sirawai, Zamboanga del Norte niadtong Enero 26, 2023. Sunod mao si Councilor Angelique Alexis Paulino sa Sto. Domingo, Nueva Ecija nga gipusil patay niadtong Pebrero 12 samtang nagmaneho sa iyang awto. Sa Pebrero 17, si Lanao del Sur Gob. Mamintal Adiong, Jr. nasamdan sa dihang gi-ambush ang ilang gisakyan apan namatay ang upat niya ka escorts. Duha ka adlaw human sa maong hitabo, gi-ambush patay si Aparri Vice Mayor Rommel Alameda ug ang iyang lima ka mga bata-bata.
Sa Pebrero 22 gi-ambush ug naangol si Mayor Ohto Montawal Caumbo, sa Datu Montawal, Maguindanao del Sur sa Pasay City, Metro Manila niadtong Pebrero 22, 2023.
Ang labing makahahadlok mao ang pagsulong sa labing minus unom ka armadong mga tawo nga nagsul-ob og uniporme sa military nga misulod sa balay ug mirakrak kang Negros Oriental Gob. Roel Degamo. Patay ang gobernador ug ang walo ka mga tawo samtang 17 ka laing mga tawo ang nangaangol samtang nagpundok aron modawat unta og hinabang gikan sa gobernador.
Duna nay tulo nga nadakpan samtang usa ka laing suspek ang namatay sa hot pursuit operation nga gihimo sa Special Investigation Task Group (SITG) Degamo. Hapit silang tanan gikan sa military.
Sumala sa SITG nga ila nang napasaka ang kaso batok sa mga suspek apan wala pa nila ilha kon si kinsa ang utok sa maong krimen bisan kon mikompisal na ang duha ka mga suspek kon si kinsa siya. Kinahanglang masilotan sa labing madaling panahon sa labing bug-at nga silot aron motagam kining mga kriminal nga may kaisog nga mosulod gayud sa kabalayan aron paghunos sa kinabuhi sa mga tawo. Kon dili na kita luwas bisan sa kaugalingon natong balay asa mang dapita ang luwas?
Kalabot niini, si Presidente Marcos nagtuo nga politika maoy hinungdan sa maong pag-atake. Mao usab ang pagtuo ni Bise Presidente Inday Sara Duterte, ni Senador Imee Marcos ug sa ubang mga politiko. Ang uban buot usab idikit si anhing Gob. Degamo sa mga walhong pundok. Mas maayo tingaling atong huwaton kon unsa gayud ang resulta niining maong kaso usa kita mohokum aron way mapasanginlan nga mga inosente.