Tungod sa iyang posibleng kalambigitan sa pagpatay sa usa ka lending collector, balay sa usa ka lending investor sa casino gironda sa kapulisan niadtong Martes, Marso 7, 2023 sa sityo Malacorong, Brgy. Usmad, Argao, habagatang Sugbo.
Giingong nakita sa closed circuit television (CCTV) ang iyang sakyanan nga maoy unang gisakyan sa duha ka mga gunman nga namusil niadtong Enero 31, 2023 sa EO Perez St., Brgy. Subangdaku sa mao nga siyudad.
Tungod niini, gironda sa kapulisan gamit ang search warrant sa korte ang residensya sa suspek nga giilang si Rolando Pantilope, alyas Enting o Tingting, diin 10 ka gihulagway nga high-powered nga mga pusil ang nasakmit.
Sa usa ka press conference sa Miyerkules, Marso 8, 2023, si Pol. Lt. Col. Franco Rodulf Oriol, deputy city director for operations ug spokesperson sa Mandaue City Police Office (MCPO), niingon nga ila lang gisilbi ang search warrant batok sa suspek human nila mahibaw-i sa ilang imbestigasyon nga ang sakyanan ni Pantilope posibleng usa sa gigamit sa pagpamusil sa siyudad niadtong Enero 31.
Nakugang sila sa pagsusi sa sakyanan ni Pantilope kay anaay daghang high-powered nga mga pusil sa sulod hinungdan nga nilig-on ang ilang pagduda sa iyang pagkalambigit sa krimen.
Narekober sa sulod sa sakyanan ang upat ka .45 caliber pistol sa lainlaing brand, usa ka .40 caliber pistol, usa ka M16 assault rifle, duha ka mga shotgun, usa ka .22 caliber pistol nga adunay silencer, usa ka .357 magnum revolver, nagkadaiyang mga magazine sa armas ug mga bala. Ang tanang mga pusil walay lisensya.
GIPUSIL
Ang biktima sa pagpamusil giilang si Conrado Cosares, 44, taga B. Aranas Ext., Duljo Fatima, dakbayan sa Sugbo, nga giingon ni Oriol nga lending collector sa laing kompaniya.
Si Cosares gipusil makaduha sa ulo sa duha ka wala mailhing mga lalaki nga nagsakay sa grey-black nga Suzuki Raider nga motorsiklo.
Si Oriol niingon nga base sa kuha sa CCTV footage, ang mga gunman gikan sa sports utility vehicle (SUV) ni Pantilope sa wala pa sila nisakay sa motorsiklo nga gigamit sa pagpamusil ug pagsibat.
“It is possible that he was the watcher of the hitmen who reported if the victim had already got out of the casino the day of the incident,” matod ni Oriol.
Kaniadto, tulo ka mga anggulo ang gitan-aw sa kapulisan sa pagpamusil ni Cosares: sa iyang pagkakombikto sa ilegal nga drugas sa 2021, personal nga rason, ug sa iyang trabaho isip lending collector.
Matod ni Oriol nga ilang gitutokan ang usa ka posibleng rason: linya sa trabaho sa biktima tungod sa pagkasikop ni Pantilope.
Matod niya nga ilang gituohan nga ang suspek kabahin sa labing menos unom ka mga miyembro nga grupo sa giingong gun-for-hire nga gitahasan sa pagpatay sa biktima.
Laing teyoriya nila ni Oriol mao nga ang suspek ug biktima posibleng kompetensya sa trabaho, labi na sa pag-ani sa mga kliyente sulod sa usa ka casino.
Matod ni Oriol nga padayon pa nilang giimbestigar ang suspek aron masuta kon duna pa ba siyay ikatug-an ug masuta kon aduna ba siyay mga naunang kaso.
Ang suspek gitanggong sa MCPO Station 2 sa Barangay Subangdaku ug mag-atubang og kasong illegal possession of firearms ning higayuna.
Sa laing bahin, ang mga armas ipaubos sa ballistic ug cross-matching examination sa MCPO Crime Laboratory aron masuta kon gigamit ba kini sa daghang mga insidente sa pagpamusil dili lang sa Mandaue City, kon dili sa tibuok isla sa Sugbo.