Gi-identify na sa Provincial Veterinary Office (PVO) ang zone plans sa mga lokal nga kagamhanan base sa pag-detect sa African swine fever (ASF) sa dakbayan sa Carcar.
Matod ni Dr. Mary Rose Vincoy, pangulo sa Provincial Veterinary Office, nga gi-tag isip red zone ang dakbayan sa Carcar.
Ang red zone nagpasabot nga apektado na sa ASF ang lugar.
Gisundan kini sa pink, yellow ug light green zones aron maestablisar ang posibleng pagtakboy sa sakit sa laing lugar.
“Ang purpose nato ana is to establish if ever naay mga spill over or naay mga higayon nga mogawas ang mga baboy from Carcar ma detect dayon,” matod ni Vincoy sa Marso 9, 2023.
Paagi usab kini nga daling ma identify ang mga lokalidad nga nagkinahanglan sa mas estriktong surveillance.
“At the same time naa dayon tay na identify nga mga LGU nga i-intensify ang surveillance. Kuhaan nato og additional sample to establish nga negative ang ilang area,” dugang niya.
Sa listahan sa PVO, gipabantayan na niini ang mga silingang lokalidad sa Carcar.
Matod ni Vincoy nga bisan pa sa mga nikatap nga istorya kabahin sa kamatay sa mga baboy sa silingang lungsod sa Carcar City, gipasabot niya nga dili pa siya dayon makahukom sa sitwasyon.
Sanglit kinahanglan nga mopaubos una sa confirmatory test ang mga baboy pagsiguro kon unsay sakit niini.
“Dili sad ko makasulti ana. But particularly within this area nga near sa Carcar but although there are reports kinahanglan pa na i-verify on the ground but mao lang sa na. Lisod man gud moistorya nga there are reports nga namatay but once mogawas ang laboratory reports nga negative,” matod ni Vincoy.
Ang lungsod sa San Fernando, Aloguinsan, Barili, ug Sibonga maoy nahisakop sa pink zone nga giisip nga buffer zones.
Samtang ang silingang siyudad sa Naga, lungsod sa Argao, Pinamungajan ug Dumanjug maoy nahimutang sa yellow zones.
Pasabot nga anaa kini sa surveillance zones, kansang lugar high-risk gumikan sa taas nga population sa mga baboy o pork products.
Samtang ang mosunod nga mga lokalidad nahimutang na sa light green ngadto na sa green zone nga maoy safe zone.
Kini nga mga zone mahimong mopasulod og produkto sa baboy o supply sa baboy ngadto sa red zone apan dili pwede nga mokuha og supply gikan sa mga critical zone.
Giklaro ni Vincoy nga bisan og luwas mokaon og baboy sanglit dili man zoonotic disease ang ASF kun motakod sa tawo, apan kinahanglan nga likayan ang pagkaon o pag-ihaw sa mga baboy nga nahibaw-an nang nataptan sa maong sakit.