Gipalapdan sa Siyudad sa Sugbo ang mga dapit nga ilang gipahamtangan og ban sa mga baboy, apil na ang tanang mga produkto niini, human nakompirmar ang mga kaso sa African swine fever sa dakbayan sa Carcar.
Mga local government unit sa unang distrito sa lalawigan sa Sugbo, gawas sa dakbayan sa Talisay, apil na sa ban sa Siyudad sa Sugbo. Duna say mga dapit sa segundo, tersero ug ikapitong distrito nga naapil.
Sa unang distrito, kini naglakip sa lungsod sa Minglanilla, siyudad sa Naga, San Fernando, Carcar City ug Sibonga.
Sa 2nd district mao ang Argao ug Dalaguete. Sa 3rd district mao ang Barili, Aloguinsan, Pinamungajan ug Toledo City.
Sa 7th district, kini naglakip sa Badian, Moalboal, Alcantara, Ronda ug Dumanjug.
Mao kini ang pahibawo sa Department of Veterinary Medicine and Fisheries (DVMF) sa Dakbayan sa Sugbo.
Ang Office of the City Markets, pinangulohan ni Wynne Cenas, nipahugot usab sa seguridad sa merkado. Ang mga namaligya sa karneng baboy nga mosulod sa public market ilang pangitaan og mga dokumento nga magpamatuod nga kini giihaw sa slaughter house ug luwas sa ASF.
Ang labing taas nga opisyal sa City Agriculture Department, Joy Baclayon, nagkanayon nga ang Cebu City, inabagan sa DVMF, nipahugot na sa ilang border control sa kanait nga mga LGU.
USA KA BUWAN
Molanat lang og labing taas usa ka buwan ang suplay sa baboy sa dakbayan sa Sugbo kon walay laing suplay gikan sa ubang mga dapit nga mosulod sa siyudad.
Kini ang gihulagway ni Baclayon sa Huwebes, Marso 9, 2023, human gi-ban na sa Cebu City ang mga baboy gikan sa ubang mga dapit sa Sugbo human nadiskobrihan ang ASF sa ihawan sa dakbayan sa Carcar.
Matod ni Baclayon nga adunay 5,000 ka mga baboy nga gipangbuhi sa hog raisers sa dakbayan sa Sugbo ug mayoriya niini tua nahimutang sa bukirang barangay nga naka-insured sa City Agriculture Department sa Dakbayan.
Sa iyang bahin, si Estela Acbayan, usa ka vendor sa karneng baboy, nagkanayon nga mokunhod ang suplay sa karneng baboy sa mosunod nga mga semana.
Sa kasamtangan, ang presyo sa karne anaa sa P300 ngadto sa P320 matag kilo nga mapalit sa Carbon Public Market.
Gumikan niini, posibleng magnihit na ang karneng baboy lapas sa Semana Santa, dugang ni Acbayan. /