DI MOUBOS sa 500 ka mga pamilya ang nawad-a'g pinuy-anan gikan sa duha ka mga barangay sa lungsod sa Maragusan nga nagrabehan sa nahitabong linog niadtong Marso 7, 2023.
Kini ang gibutyag ni Mayor Angelito "Lito" Cabalquinto sa Maragusan kinsa personal nga nahinabi sa SuperBalita Davao alas 11:00 sa buntag, Huwebes.
Matud pa sa mayor nga mga nahisgutang barangay mao ang Paloc ug Tandik kung diin ang mga molupyo sa tulo ka purok sa Paloc gipabiya sa tagsa-tagsa nila ka pinuy-anan nga naguba.
Samtang mga molupyo sa Purok 7 temporaryong gipahimutang sa Paloc Gym ug ang mga molupyo sa Purok 6 ug Purok 8 anaa kilid sa highway ug gihatagan og tulda ug trapal nga temporaryo nilang kapasilongan.
Gawas sa Paloc, aduna say mga balay sa Barangay Tupaz nga partially damaged apan giingon nga di sama kadako ang danyos itandi sa Paloc ug Tandik.
Dugang gibutyag ni Cabalquinto nga ang yuta sa Paloc ug Tandik gikonsidera nga volcanic land nga dunay porsiyon niini nga pulos bato ug duna say balas ug humok hinungdan nga sa dihang mitay-og ang linog, daling naguba ang mga balay nga gitukod gumikan kay wala'y lig-ong pundasyon sa yuta.
Di pa masulti sa mayor kung hangtud kanus-a ang mga bakwit sa ilang nahimutangan sanglit maoy gipaabot ang desisyon ug pahimangno gikan sa Philippine Institute of Volcanology and Seismology (Philvolcs).
Gisulti sab ni Cabalquinto nga kinahanglan nga ibalhin og kapuy-an ang mga namuyo sa Purok 7, Barangay Paloc gumikan kay naguba gyud ang mga balay ug ang yutang gitukuran niini dunay mga dagkong liki.
Samtang sa sentrong bahin sa lungsod giingon nga mga menor lang nga mga kadaut ang naangkon sama sa ginagmay nga liki.
Giklaro hinuon sa mayor nga walay natalang naangol o nakabsan sa kinabuhi bisan pa kung dunay landslide ug pagpangatagak sa mga bato partikular sa Barangay Camanlangan atol sa linog nga nahitabo.