Nikabat sa 300 ka mga baboy gikan sa tulo ka apektadong mga barangay ang gipangpatay sa dakbayan sa Carcar sa Biyernes, Marso 10, 2023.
Gipahibalo ni Carcar City Mayor Patrick Barcenas nga gawas sa mga baboy sulod sa apektadong mga barangay, gisusi na usab sa veterinarians ang pagpatay sa mga baboy nga nasulod sa 500-metros gikan sa nahimutangan sa apektadong mga lugar.
“Gani karon mag-culling (patay) ta no sa tulo ka mga barangay. Ang gihimo nato karon gikan sa mga naay epekto, mga nasakit 500 meters ihawon, patyon gyud nato,” matod ni Barcenas sa Superbalita Cebu sa Marso 10, 2023.
Dugang sa mayor nga may na-identify na nga luna nga kalubngan sa mga baboy ug dalion kini pagtabon uban sa pagbutang og medisina aron dili makatakod sa uban.
“Basta kay dauban. Human og daub isulod sa lungag nga dako, butangan og disinfectant nga medisina ug takuban. Naa na’y na identify nga area sab ang (Department of Agriculture (DA),” dugang niya.
APEKTADO
Giangkon ni Barcenas nga apektado sa pagkakaron ang mga manindahay, apan iyang gipasalig nga gikatakda na siyang makigtigom sa mga sakop sa DA sa rehiyon ingon man sa Department of Social Welfare and Development (DSWD) alang sa pinansyal nga ayuda ug insurance sa hog raisers ug ubang mga manindahay, kansang baligya apektado sa African swine fever (ASF).
“Naa ta’y gihisgutan nga insurance sa mga baboy ug tabang kay hastang paita, luoya naman ani. Kami diri sab sa LGU ang sa DSWD, mangita mig paagi nga makahatag mi nila bisan og ginagmay basta naa, amo lang ipa record,” matod ni Barcenas.
Gawas sa hog raisers, apektado usab ang mga manindahay og chicharon bisan kon gitugot pagbaligya ang mga supply nga dugay na.
Ang usa ka chicharon vendor sa dakbayan sa Carcar, nga si alyas Jane, nagkanayon nga nakasinati sila sa deperensya sa kita sa pagpamaligya gumikan sa sakit sa baboy.
Matod ni Jane nga kon sa regular lang nga adlaw, mokita siya og tag P500 ngadto sa P600. Apan karon, dason niya, katunga na lang.
“Nakaapekto gyud gamay kay menos ang mamalit kay mahadlok daw sila sa sakit ba. Pero amo man sad sila explainan nga ang karne nga giluto namo sa chicharon ba is imported, dili siya gikan sa Pilipinas. Mao na inig abot diri kompleto nana siya og mga papeles,” matod ni Jane nga nahinabi sa sibyaanang DyHP.
Matod ni Barcenas nga dili angay mahadlok ang mga tawo sa pagpalit ug mokaon sa chicharon sanglit imported ang karne nga gigamit niini.
Gihangyo usab niya ang publiko nga likayan ang diskriminasyon ug pagkahadlok sanglit naningkamot usab ang Siyudad ug kagamhanan sa pagsumpo sa pagtakod niini sa ubang dapit.
“Kaning mga pumapalitay og chicharon, litson. Ang nahitabo sa amo karon, naningkamot sad ang siyudad, ang gobernador nga makabangon mi kay gamay naman lang na. So far, wala naman nuo’y nangamatay. Sige mi og pa check karon pero nag negative na man,” matod ni Barcenas.