Nangayo og pagsabot gikan sa publiko ang opisyal sa Cebu Bus Rapid Transit (BRT) project gumikan sa kahasol nga namugna niini nunot sa pagsugod na og trabaho sa P16.3 bilyunes nga mass transport sa dakbayan.
Si Engr. Norvin Imbong, CBRT project manager, maoy nangayo og dispensa sa katawhan nga apektado sa proyekto labi na nga gikoral na ang duha ka mga habig sa mamahimong dedicated lanes aron paghatag og agianan sa construction.
“Ako lang gihangyo sa publiko nga pasensiya lang gyud una gamay kay wala man gyuy ingon ani nga improvement nga dili makahasol sa (riding public). Naa gyuy gamay nga kahasol,” padayag ni Imbong.
Ang BRT project nag-usa na ka semana kagahapon, Marso 10, dihang unang gibutang sa Hunan Road & Bridge Construction Group Company Limited ang koral aron makakawot, makahakot sa yuta ug aspalto, dayon makasemento sa duha ka dedicated lanes sa Osmeña Boulevard, duol sa Cebu Community Medical Center (kanhi Visayas Community Hospital).
Ang package 1 sa CBRT adunay 2.38 kilometros nga distansiya gikan sa atubangan sa Cebu Provincial Capitol paingon sa Cebu South Bus Terminal.
Si Imbong nagkanayon nga nagkantidad og P1.048 bilyunes ang package 1, diin ang kompaniya gikan sa China ang nidaog human sila ni-bid og kapin sa P900 milyunes.
Matod pa sa project manager sa CBRT nga kon walay mga kakulian, mahuman ang maong proyekto ug makasugod na og pasakay og pasahero sa katapusang quarter karong tuiga.
Ang package 2 nga wala pa ipaubos sa competitive public bidding magsukad sa CSBT paingon sa South Road Properties (SRP) ug gikan sa Kapitolyo paingon sa IT Park.
Ang package 3 gikan sa IT Park paingon sa Talamban sa norte ug Mambaling sa Cebu City paingon sa Talisay City ug SRP paingon sa Talisay sa south nga maoy mga feeder line.