Gawas nga gidiklarar ang Marso isip Buwan sa Kababayen-an o Women’s Month, sipa sab ang trumpa ug tingog sa wangwang sa mga bombero nga nag motorcade ug tuyoktuyok sa tibuok lungsod pagpahinumdom nga nagsaulog sab ta sa Fire Prevention Month.
Ang tema karong tuiga ‘Sa Pag-iwas sa Sunog, Hindi ka nag-iisa’ (sa paglikay sa sunog wa ka mag-inusara) kay magtambayayong man ta panahon sa kalamidad sama sa sunog lakip ang paghimo og mga lakang nga mapalayo sa peligro.
Kita mismo sa atong tagsa-tagsa ka banay makahimo og mga pampamilyang mga lakang pagtudlo sa atong mga kabanay kon unsaon nga mapalayo sa disgrasya sa sunog.
Sayod kita sa makadaghang mga higayon nga ang sunog di ni moila o mohuwat nimo maong sa layo pa angay na kitang magplano kon unsaon pag eskapo.
Atong sugdan ang pagpangandam sa atong kaugalingong panimalay.
Pinaka-kumon nga hinungdan sa sunog mao ang pagbiya sa giluto sama sa akong higala nga si Annie. Piniritong Lumpia ray nakaingon sa pag-ugdaw sa ilang pinuy-anan kay iya mang gibiyaan iyang niluto kay nangasilyas kadiyot. Sa iyang pagbalik, nagdilaab na iyang stove unya ang kayo mikatay na paingon sa kurtina hangtod nga mi-abot sa tangke sa gas unya mibuto. Hasta siya wa ka eskapo kay nalanay og apil iyang nawong ug kamot pagkasunog.
Sunod kining paggamit og kandila labi na panahon sa brownout. Ayaw gayod intawon biyai ang kandila nga magsiga kon mangatulog na unya ipalayo sab kini sa mga gagmay’ng bata, iro o iring aron di maduwaan ug malayo sa disgrasya.
Ang pagpanigarilyo usa sab sa makainigon sa sunog labi na og di maayo pagpatay ang upos. Angay manigarilyo sa gawas dili sa may katre nga duol sa mga panapton o sa tangke sa gas kay dali kining modakop og kayo.
Likayi ang patuyang nga pagsaksak sa mga outlet, ang uban mura og kugita, sa kadaghang naglatay ug nagsapaw nga nga paggamit sa kuryente kay delikado kini sa overload.
Tagui ang mga lighter o posporo aron di duwaan sa mga bata unya palungon sab ang tangke sa gas kon di na gamiton.