Kon seryuso ang Dakbayan sa Sugbo sa pagpatuman sa bike lane ordinance, ang Mandaue City wa magpaiwit. Kon mag-agian ka sa main highway sa Mandaue, makabantay ka nga dunay konkretong barrier ang mga portion sa ilang bike lane.
Pinaagi sa barrier, ma discourage ang four-wheeled o pataas sa pagpadaplin og maayo o pagsubay sa bike lanes. Di sama sa Cebu City nga duna pay mo-park nga mga sakyanan, nga maoy numero unong suliran sa Sugbo Bike Lanes Board sa Cebu City.
Wa sab kaayo ko nakakita og mga sakyanan nga nagbabag sa mga bike lane, di sama sa Cebu City nga dunay mga portion nga gihimo kining parking area.
Subli usab nga gipang-ayo sa Mandaue City ang ilang bike lanes kay natural, ang pintal sa karsada mangapapas man gyud sa paglabay sa panahon.
Kon sila nag-ugmad og balik sa bike lanes, ang Cebu City usab busy sa pagpanakop sa mga driver sa mga sakyanan nga mang-park sa lane ug nakababag sa mga siklista.
Bisan gud naa sa dapit nga dunay no parking sign anha diha manghunong. Sa tigsikad pa ko sa Barangay Busay, diha sa ubos pa lang sa Brgy. Lahug, daghang mga sakyanan ang wa manumbaling sa mga sign.
MAG-ESTORYA
Bisan tuod kon di na sama kaniadto kadaghan sa mga biker ang manungas sa Busay kon itandi kaniadtong mga lima ngadto sa 10 ka tuig ang nakalabay, naa gihapoy siaw nga mga manikad. Mag-estorya sila sa karsada as if sila ray naa. Wa manumbaling nga nakapahinay sila sa dagan sa trapiko.
Mao usab ni ang akong naobserbahan sa Cebu North Road kon weekend, labina kon sayo pa sa buntag. Di lang kay usa kon di daghang bikers ang nagbuhat niini.
Kami kaniadto kon mag ride, labina sa among grupo sa Talamban ug Bacayan, maglinya mi ug magsunod aron di mi makababag sa dan. Gitudloan sab nako ang akong mga anak niini dihang tig bike pa mi katuigan na ang milabay.
Road courtesy man gud ni agi og pagtahod usab sa ubang road users. Di man kay kita ra ang naa sa karsada.
Niabot gani ang panahon nga ang bikers gisaway, labina niadtong panahon sa pandemic, kay maorag maoy hawod sa dan.
BIKE LANE
Nganong di man tun-an sa Dept. of Transportation (DOTr) ang pagbutang og bike lane sa main highways diin lapad ang karsada?
Sa ingon dunay masubayan ang bikers nga lane samtang magsikad. Tingali pinaagi niini, uban sa pakigtambayayong sa maagian nga mga local government unit, mabutangan og exclusive bike lane ang portions sa national highway sa norte ug south.
Tingali maghimong mas luwas sa bikers ang pagsikad sa karsada, diin kadaghanan sa mga sakyanan maghaguros ang dagan.
Malikayan pinaagi niini ang makamatay nga mga disgrasya. Niini usab, mapugngan ang abusadong bikers sa pagbabag sa agianan sa mas paspas nga mga sakyanan.
Nisaad ra ba ang DOTr sa pagbutang og dugang bike lanes sa kadalanan.
Higayon na karon nga ang bag-ong mga karsada, sama sa Metro Cebu Expressway nga manukad sa dakbayan sa Naga paingon sa dakbayan sa Danao nga butangan og exclusive nga bike lane.
Ang duha ug tunga ngadto sa tulo ka metros nga gilapdon sa bike lane maayo na kaayo na alang sa luwas nga pagtindak mga siklista. Hinaot pang iapil kini sa umaabot nga dagkong mga proyekto sa karsada.