Oppps...Daw og sa miinit og balik ang panagsungi sa amahan ug anak nga sila si Nonito Donaire Sr. ug Nonito Donaire Jr.
Sa iyang post sa Facebook, si Donaire Sr. nagkanayon nga daw og sa dili siya katuo sa gipakitang taras ni Donaire Jr. ngadto kaniya karon nga nakwartahan na kini.
Ingon niya nga nakaako na si Donaire Jr. sa pagsinghag kaniya nga unta siya man ang nag-umol niini kon unsa na siya karon.
Balik saysay ni Donaire Sr., aka “Dodong,” nga siya ang ni-trained sa iyang anak sa sayong bahin sa boxing career niini ug sa kalit lang gibiyaan siya sa dihang anaa na kini sa iyang peak ug nahimong world champion.
Mora man tuod og namuyboy si Dodong pero di sab gyud ta ka basol kon nganong naingon ani siya. Tiaw mo bay kalit lang nagkuha og laing trainer si Donaire Jr. ug giilisan siyag kalit nga wa pahibaw-a.
Gawas niini, bisan gani kuno sa mga victory party sa iyang anak dili siya imbitahon. Kinsa mang amahana ang malipay niini?
Unya karon kuno nga nagkaus-os na ang career niini siya na usab ang gibasol. Wa nuon mosulti si Dodong kon giunsa siya pagbasol.
Pero sa nahipos nakong kasayuran nga nabalik ang ilang panagsungi tungod kay nasuko diay ni si Donaire Jr. nga ang iyang amahan mao karon ang trainer/second sa laing Pinoy prospect nga si Reymart Gaballo kinsa posibling maoy iyang makontra alang sa world title fight.
Sa ato pa, kon madayon ang away, si Donaire Sr. adto sa corner sa kontra ni Donaire Jr. Mora og anak batok amahan.
Matod ni Dodong, “it’s nothing personal. I have a family to feed.” Pastilan. Kon wa ko masayop first time ni sa kasaysayan sa boxing.
Nagsugod man gud ning ilang panagsungi sa dihang naminyo si Donaire Jr. kang Rechelle, kinsa giingon nga mao na karon ang nag-manage kang Nonito.
Si Rechelle, matod pa, mao na ang magbuot sa tanang kalihukan sa boxing career ni Nonito.
* * *
Palahi ta. Sa miaging mga adlaw, pipila na ka mga higala nato sa sirkulasyon sa sports ang nabiktima niining papang-hacked og account sa Facebook.
Unya ang hacker ari dayon mohimo sa ilang pagpangilad sa Messenger gamit ang account sa ilang gi-hacked, dayon pangayo o panghuwam og kuwarta nga ipaagi sa Gcash.
Niadtong Huwebes, nakadawat kog message gikan ni Bong Pineda, kanhi asst. coach sa UV Lancers ug USJR Jaguars.
Manghuwam kuno siya og P5,000 unya iya lang ilisan dayon pipila ka oras ang molabay.
Maayong modiskarte kay mangutana mag una kon busy ba ta.
Daling misantop sa akong hunahuna ang nahitabo usab sa kang Ronan Tabanao, amahan sa bigman sa USJR Jaguars.
Wa gyuy kalainan. Mao gyud ang pattern nga gisunod sa pagpangilad.
Ato kunohay gitubayan pero wala na mo reply sa dihang nakabantay nga nakahibawo na ta sa iyang modus.
Si coach Gary Cortes sa UV nakadawat sab og message nga nangayo sab og P5k pinaagi sa Gcash. Daghan pa gyud diay ang gipangayoan, matod pa. Ambot og duna ba say nakahatag.
Mao ni ang Gcash number sa hacker - 09458100195. Dili na ma contact. Akong suwayan ni og report sa Gcash customer service or sa Gcash customer care hotline aron mailhan ug ma trace up kon kinsa ning maong hacker.
Mao ni usa sa mga pamaagi pag counter sa ingon aning klase nga scam.