Gipabaha sa Nasudnong Kagamhanan ang kapulisan ug kasundalohan aron puhagon ang private armed groups ug mga kriminal sa Negros Oriental.

Gidugangan og pwersa ang mga sundalo sa lalawigan aron moabag sa kapulisan sa pagpatunhay sa kalinaw ug kahusay human sa dugoon nga insidente nga nakapatay kang Gobernador Roel Degamo ug sa walo ka mga tawo.

Matod ni Department of National Defense Secretary Carlito Galvez Jr. nga mimando kaniya si Presidente Ferdinand “Bongbong” Marcos Jr. nga gawas sa problema sa insurgency sa Negros Oriental, kab-uton usab ang hustisya sa kamatayon sa gobernador.

Tungod niini, giumol sa DND ang Joint Task Force sa Armadong Kusog sa Pilipinas ug Philippine National Police (PNP) nga maoy mopuhag sa mga kriminal sama sa mga private armed group nga gipaluyohan sa mga pulitiko.

“The President has verbally called out the support of the PNP and the AFP to suppress yung impunity and lawless violence dito sa Negros,” matod ni Galvez Jr. sa Sabado, Marso 11, 2023.

Gimandoan usab sa Pangulo nga dakpon ang tanang mga suspek sa pagpatay kang Degamo.

Pagpabaha sa mga tropa ang gimando sa Presidente ngadto sa kapulisan ug kasundalohan sa Negros Oriental, matod ni Galvez, nga maoy molutos sa private armed groups.

BAG-ONG TAHAS

Di mominos sa 8,000 ka mga sundawo ug pulis ang naa sa Isla sa Negros ning higayuna.

Si AFP Chief of Staff General Andres Centino nga mitambong sa press briefing sa Negros Oriental Provincial Capitol sa Sabado Marso 11, 2023, nibutyag nga dunay tulo ka battalions ug duha ka brigades sa Philippine Army ang naglihok karon sa isla sa Negros.

Ang matag battalion dunay labing minos 500 ka mga sundawo samtang ang matag brigade dunay 3,000 ngadto sa 5,000.

Samtang ang Negros Oriental Police Provincial Office (NPPO) dunay labing minos 1,700 ka ginsakpan.

Kining maong mga unit sa kasundalohan, matod ni Centino, gihatagan og bag-ong tahas gawas sa pagsulbad sa insurgency sa duha ka mga probinsya, nga mao ang paggukod sa mga kriminal nga gipaluyohan sa mga pulitiko.

Giklaro sa heneral nga dili lang ang napulo ka mga suspek sa pagpatay kang Degamo ang ilang gigukod sa pagpangulo sa kapulisan, lakip na niini ang mga local contact nga maoy nagtago niini sa maong probinsya.

Iyang giklaro nga ang pagpakatap sa daghang sundalo sa Negros Island wala magpasabot nga militarized na ang maong isla sanglit ang tumong ug tuyo niini nga mabati sa mga lumolupyo ang kaluwasan sa ilang kinabuhi ug paghatag sa hustisya dili lang sa gobernador, lakip na sa laing walo ka mga kinabuhi ug sa mga nangaangol.

“We will give justice to the death of many people including our beloved governor na kailangan talaga na wakasan na yung karahasan..Ang directives ng ating mahal na Presidente kailangang maibigay ang justice ni Governor Degamo soonest possible time,” matod ni Galvez.

NASAKMIT

Samtang laing duha ka mga armas nasakmit sa Special investigation Task Group Degamo sa Biyernes Marso 10, 2023 sa Sitio Palasanun, Barangay Cansumalig, Bayawan City.

Ang duha ka armas nga naglangkob sa duha ka assault rifles, magazines, bandolier nga dunay plate ug mga bala.

“In the continuing hot pursuit operations, the two firearms recovered were 2 assault rifles, magazines, bandolier with plate and ammunitions. The firearms are forwarded to SOCO for appropriate forensic examination,” matod ni Police Lt. Col. Gerard Ace Pelare, SITG spokesperson.