Wa pakyasa ni superstar guard Stephen Curry ang mga dumadapig sa Golden State Warriors kay ang league-leading Milwaukee Bucks gyud ang gibihag sa iyang pagbalik sa Chase Center human ang hataas nga pahuway tungod sa injury.
Kulbahinam nga opensa ug depensa ang gipakita ni Curry sa hinapos nga bahin sa duwa aron aswaton ang Warriors ngadto sa 125-116 OT win sa National Basketball Association (NBA) game didto sa San Francisco, California kagahapon.
Mipabuto og 36 puntos si Curry, 22 niini iyang gimugna sa crucial nga fourth quarter ug overtime, aron markahan ang iyang first home game og kadaogan.
Ang tres ni Curry maoy nakatabla sa duwa sa nahabiling 19 segundos sa fourth quarter. Sa depensa, gitapalan ni Curry ang layup ni Jrue Holiday nga mao untay makahatag og kadaogan sa Bucks.
Miratsada na ang Warriors sa overtime dayong langkat sa kadaogan aron isaka ang ilang baraha ngadto sa 35-33 (win-loss).
Nagmaya ang Warriors head coach nga si Steve Kerr sa gipakitang duwa sa iyang mga batos.
“I loved this game. I thought we competed the entire time,” batbat ni Kerr. “I thought we were really solid for most of the night.”
Ang “Splash Brother” tandem ni Curry nga si Thompson midugang og 22 puntos, samtang si Donte DiVincenzo miamot og 20 points ubanan sa 10 rebounds.
Nalipay si Curry sa iyang gibuhat nga depensa batok ni Holiday.
“To hit a couple big shots down the stretch and then find yourself in a position where you can make a play on the other side, it gives everybody a good boost because it’s shocking,” matod ni Curry. “I think I got more about that in the locker room than any shot I made tonight, which speaks for itself.”
Ang Bucks gipangulohan ni Khris Middleton na adunay 19 puntos ug lima ka assists.
Si Holiday mikamada og 18 puntos, siyam ka rebounds ug walo ka assists.
Samtang si Bobby Portis miamot og 15 puntos ug 13 ka rebounds ug si Brook Lopez mihatag og 19 puntos, pito ka rebounds ug lima ka blocks.
Wa makaduwa ang Bucks leading scorer ug rebounder nga si Giannis Antetokounmpo tungod sa right hand soreness.
Nagpabiling top team ang Bucks sa NBA standing bitbit ang 48-19 nga rekord. (RSC)