Sa usa ka health advisory, ang Department of Health (DOH) nag-ingon nga ang African swine fever (ASF) sakit nga motakboy lang sa mga baboy ug di kini hulga sa panglawas sa katawhan. Luwas kan-on ang karneng baboy basta ayuhon kini sa pagluto.
Nunot kini sa pagkonpirmar nga dunay kaso sa ASF sa lalawigan sa Sugbo. Ang mga eksperto miingon nga ang ASF motakod sa laing baboy kon makakaon og hilaw o di maayong pagkaluto nga contaminated pork products.
Si DOH 7 Director Dr. Jaime Bernadas namahayag nga luwas ang pagkaon sa karneng baboy nga maayong pagkaluto ingon man sa processed pork kon napalit kini gikan sa kasaligan nga namaligya.
* * *
Apan mipasidaan ang Central Visayas Pork Producers Cooperative (CeViPPCo) nga hayan makasinati og kanihit sa karneng baboy ang Metro Cebu kay gi-ban sa mga siyudad sa Sugbo, Mandaue, Lapu-Lapu ug Talisay ang pagsulod sa mga baboy gikan sa ASF-infected areas sa habagatang Sugbo.
Si Jonathan Young, presidente sa CeViPPCo, miingon nga ang Metro Cebu nagsalig sa mga baboy gikan sa mga backyard ug commercial hog farms sa habagatang Sugbo, ilabi na sa mga lungsod sa San Fernando, Minglanilla ug Dumanjug ug siyudad sa Toledo.
Ang siyudad sa Talisay ug lungsod sa Minglanilla ubos sa protected zones, samtang ang mga lungsod sa San Fernando ug Sibonga mga buffer zone. Ubos sa surveillance ang siyudad sa Naga, samtang ang Carcar City mao ang infected zone kay didto sa usa ka ihawan niini nakonpirmar ang unang kaso sa ASF.
* * *
Tungod sa ban sa pagsud sa mga buhing baboy gikan sa habagatang Sugbo ingon man sa isla sa Negros, ang supply sa karneng baboy sa Metro Cebu magagikan sa amihanang bahin sa Sugbo.
Si Ceby City Agriculturist Joey Baclayon miingon nga ang siyudad sa Sugbo adunay 5,000 ka mga baboy, kasagaran sa mga bukirang barangay. Kon kini maoy saligan, molanat pa kini og usa ka buwan.
Kon magnihit ang karneng baboy, mosaka ba sab ang presyo niini? Sa pagkakaron, ang presyo sa buhing baboy anaa sa P165 ngadto sa P175 kada kilo. Sa Carbon Public Market, ang presyo sa karneng baboy anaa sa P300 nga P320 ang kilo. Di diay makapabarato sa presyo sa karneng baboy ang ASF?