IMPAS ang tulo ka mga suspek samtang laing duha ang nakaikyas atol sa search warrant operation sa kapulisan alas 8:00 sa buntag niadtong Sabado, Marso 12, 2023 sa Pikit, Cotabato Province.
Giila ang mga nakabsan sa kinabuhi nga sila si Maano Sanday, Norman Samsudin ug Baganian Baguinda Alimao, 65-anyos.
Samtang ang nakaikyas mao si Abdullah Kurdotoy ug Jonathan Kadalem, pulos molupyo sa Barangay Macabual, Pikit.
Nasayran nga atol sab sa operasyon, nasamdan si Corporal Eric Saltin Buslayan nga sakop sa 45th Special Action Company (SAC) sa Philippine National Police-Special Action Force (PNP-SAF).
Gibutyag ni Cotabato Police Provincial Office Director Colonel Harold Ramos nga nagpahigayon og search warrant operation ang PNP-SAF ug Pikit Municipal Police Station, uban ang militar batok sa mga suspek sa nahisgutang barangay.
Sa dihang padung na untang mosulod ang mga pulis sa ilang target, kalit silang gipabuthan sa mga suspek nga miresulta sa binayloay ug mga bala.
Narekober gikan sa mga suspek ang duha ka M16 rifles, duha ka bandoliers, usa ka homemade shotguns, duha ka short steel M16 magazines, 48 ka buhing bala ug uban pa.
Daling gidala sa balay tambalanan ang tulo ka mga suspek apan gideklara sa mga doktor nga dead on arrival human nakaangkon og daghang mga samad sa bala.
Nasayran nga mga suspek dunay of warrant of arrest sa kasong multiple murder ug multiple frustrated murder.
Sa pagsuwat ning balita, gipangita pa sa kapulisan ang duha nga nakaikyas.