Tulo ka diversion road projects sa dakbayan sa Lapu-Lapu nga magdugtong sa Sudtonggan sa Barangay Basak ngadto sa Barangay Gabi sa lungsod sa Cordova, George Tampus Road sa Barangay Basak hangtod sa Kaloko/Timpoloc sa Barangay Babag ug Pakpakan sa Barangay Basak hangtod sa Collinwood, gipaabot kasugdan sa hinapos ning tuiga.
Matud ni Mayor Junard 'Ahong' Chan, ang City Government ug ang buhatan sa iyang asawa nga si Lapu-Lapu Lone District Rep. Ma. Cynthia Chan, nigahin og pundo alang sa maong mga proyekto nga gipaabot nga makapaluag sa trapiko sa dakbayan.
Hinuon, wala pa gibutyag ni City Engineer Perla Amar ang kinatibuk-ang gasto sa mga proyekto ug ang tinubdan sa pundo.
Apan, si Atty. Michael Dignos, kanhi konsehal sa dakbayan sa Lapu-Lapu, niingon nga kinahanglang seguraduhon sa siyudad nga kining mga proyekto sa imprastraktura dili mausik sa pundo sa publiko.
“These projects must have a traffic feasibility and impact study for them to positively say that it will solve the traffic problem. Otherwise, it is another waste of public funds, especially when the City incurred deficit for two consecutive years already,” matud ni Dignos sa SunStar Cebu.
Gawas sa diversion roads, gibutyag usab ni Chan ang upat pa ka dagkong proyekto sa imprastraktura atol sa bag-o lang nga “The Dialogue” forum uban sa mga stakeholder sa turismo sa siyudad.
Mao kini ang pagtukod og flyover sa Marigondon Crossing aron matubag ug ma-decongest ang gidaghanon sa mga sakyanan sa maong lugar; tri-level interchange sa ML Quezon Ave., nga iyang gihulagway nga flyover nga magsilbi nga alternatibong rota sa mga gikan sa Barangay Basak paingon sa Pusok o vice versa; ikaupat nga taytayan nga nagdugtong sa Mandaue City ug Lapu-Lapu City; ug ang pagtukod ug coastal highway padulong ug gikan sa ikaupat nga taytayan.
Ang tri-level interchange sa M.L. Quezon Highway, matud ni Chan, maghatag og free-flowing nga trapiko ug makapakunhod sa gidaghanon sa mga sakyanan nga mag ung-ong sa traffic light paingon sa unang taytayan.
Hinuon, ang mayor niingon nga ang Siyudad wala pa mogahin og pundo alang sa maong mga proyekto.
Ang mayor, niadtong Pebrero 22, nitug-an sa SunStar Cebu nga ang Department of Public Works and Highways (DPWH), uban ang financing gikan sa Japan International Cooperation Agency (Jica), mohimo og coastal road sa dakbayan nga magdugtong sa ikaupat nga taytayan ug ang 400 ka ektarya nga Mactan North Reclamation Development Project (MNRDP).
Gihisgotan usab ni Chan atol sa forum ang pagtukod sa Lapu-Lapu Expressway, nailhan usab nga skyway project, nga gipaabot nga magsugod sa Septiyembre, tungod kay nagpadayon pa ang pag-align sa P24.8 bilyones nga budget ug molanat og labing menos unom ka buwan.
Si City Attorney James Allan Sayson, niadtong Pebrero 23, niingon nga ang siyudad dili mogasto og bisag usa ka sentimo alang sa pagtukod sa skyway sanglit ang joint venture partner niini nga LLEX Corp. maoy moabaga sa gasto.
Ang LLEX magdugtong sa Cebu-Cordova Link Expressway, nga motapos sa Barangay Gabi sa Cordova, ngadto sa Mactan-Cebu International Airport (MCIA). Gilauman nga magamit kini sa 2025.
Matud ni Chan, makapaluag kini sa trapiko ug makapamubo sa oras sa biyahe gikan sa SM Seaside sa Cebu City paingon sa airport ug vice versa. (MKG)