Armas gigamit sa pagpatay ni Degamo nasuta sa ballistic examination sa PNP

Usa sa mga tag-as nga kalibre sa armas nga nabawi gikan sa mga suspek, nasuta nga gigamit sa pagpatay kang Negros Oriental Governor Roel Degamo, sumala sa tigpamaba sa Philippine National Police (PNP) nga si Colonel Jean Fajardo sa Sabado, Marso 11, 2023.

Sa press conference, si Fajardo niingon nga ang assault rifle nga nakuha gikan sa upat ka mga dinakpan positibong gitumbok nga gigamit atol sa insidente human sa gipahigayong ballistic examination.

Siya niingon nga gawas sa mga testimonya sa mga armadong lalaki nga ning-angkon sa pagpatay kang Degamo, ang mga imbestigador nagtrabaho usab sa forensic nga ebidensya aron mas hingpit masubay ang kaso batok sa mga nagpaluyo sa insidente niadtong Marso 4, 2023, nga nikalas usab og walo ka mga tawo.

Matod ni Fajardo, nakig-estorya na usab sila sa tag-iya sa mga sakyanan nga gigamit sa krimen aron mailhan kon nganong naabot kini sa mga kamot sa mga suspek ingon man ang mga “unrecorded” nga armas.

Kasong murder ug frustrated murder ang gipasaka sa Department of Justice (DOJ) batok sa upat ka nasikop nga mga suspek nga sila si Benjie Rodriguez, Joven Calibjo Javier, Joric Labrador ug Osmundo Rivero ug 12 ka John Does nga naglakip sa laing lima ka gunmen ug mastermind.

Subay sa mando ni Presidente Ferdinand “Bongbong” Marcos Jr. nga masiguro nga ang mga sad-an sa ngilngig nga krimen mataral sa hukmanan, si Fajardo niingon nga usa ka Special Investigation Task Force ang giumol.

Matod niya, pangulohan kini ni Interior Secretary Benhur Abalos Jr. ug lakip sa mga miyembro mao ang Armed Forces of the Philippines, National Bureau of Investigation ug ang Department of Justice.

“Ang intention po nito to harmonize po lahat po ng efforts and to make sure na iisa lang po ‘yung direction po nang mga law enforcement agencies...to make sure we could immediately the soonest possible time ay maresolba po itong kaso na ito,” pasabot ni Fajardo.

Siya niingon nga ang AFP nagtabang usab sa PNP aron masiguro ang kalinaw ug kahusay sa Isla sa Negros ug alang sa pagpahigayon sa road blocking aron mapugngan ang mga miikyas nga mga suspek.

Si Fajardo niingon nga ang NBI nagplantsa sa documentary requirements aron masiguro nga hugot ang kaso batok sa mga naghimo sa krimen.

Sa sayo pa, giila sa mga dinakpan nga si “Cong Teves” ang utok sa pagpatay kang Degamo.

Ang representante sa ikatulong distrito sa Negros Oriental nga si Arnulfo Teves una nang nihimakak sa krimen. (SunStar Philippines)