Diputado: Linuog nga pagpatay

Diputado: Linuog nga pagpatay

Daghan ang natingala og ngano nga dali ra kaayo nadakpan ang mga suspek sa linuog nga pagpatay kang kanhi Gobernador Roel Degamo didto mismo sa iyang panimalay sa Pamplona, Negros Oriental.

Adunay tubag si Pamplona Mayor Janice Degamo, asawa sa namatay nga gobernador.

Matod pa ni Mayor Janice, dako kaayo og gikatabang ang social media sa pagdakop sa mga suspek. Ug labi na nga dako kaayo og gikatabang nga atol sa pagkahitabo, adunay CCTV nga nag-record sa tanang panghitabo.

Tungod sa mga hulagway nga makita sa CCTV footage, nagkataykatay dayon ang mga hulagway nga migawas sa Facebook ug dali ra kaayo mikatap ang hulagway sa sakyanan apil ang mga dagway sa mga mamumuno.

Mao kini ang hinungdan nga dali ra kaayo ang taho nga nakit-an ang gigamit nga sakyanan nga gibiyaan sa mga suspek ug dali ra sab nailhan ang mga suspek kay matod pa, ang mga gipang-sul-ob sa mga suspek sa pagdakop mao ra sab ang gipang-sul-ob nila panahon sa pagpusil base sa CCTV footage.

Mao kana ang hinungdan ngano nga sulod sa 7 ka oras gikan sa pagpusil, nadakpan na dayon ang mga suspek, matod pa ni Mayor Janice Degamo.

* * *

Nidugang si Mayor Janice nga wala sila magdahom nga mosulod sa ilang panimalay ang mga mamumuno.

Tinuod kuno nga dugay na sila nakadawat og taho nga delikado ang kinabuhi ni Gobernador Roel, labi na sa dihang mihural ug mibalik na pagka-gobernador si Degamo human sa piniliay.

Apan ang ilang gibantayan kanunay mao ang gitawag og “riding in tandem,” apil na niini ang posibling pag-ambush sa iyang mga byahe-byahe sa probinsiya. Wa gyod masulod sa ilang plano nga pagbantay ang posibilidad nga mosulod pa sa ilang panimalay ang mga mamumuno.

Kompiyansa ra kaayo mi, matod pa ni Mayor Janice. Pero ang ilang gihimo klaro gyod kaayo nga linuog nga paagi, wa na lang gani maghunahuna nga daghang mga sibilyan naapil sa ilang gibuhat, dugang pa niya.

* * *

Daghan kaayong mga sundalo ug mga pulis nga anaa karon sa Negros Oriental, apil sa grupo nga nangita og paagi nga mapatuman ang kalinaw ug kahusay sa tibuok probinsiya, apil na ang pagpangita sa nahabilin nga mga suspek sa pagpatay kang Degamo.

Apil na niini ang pagbutang sa duha ka mga Army chopper nga mahimong gamiton sa mga sundalo ug kapulisan sa ilang misyon sa probinsiya.

Mao kini ang resulta sa mando ni President BBM (Bongbong Marcos) human sa iyang pagbisita sa haya ni Degamo ug makita dayon nga kon ang Presidente na gani ang momando, mogawas gyod dayon ang resulta.

Ang gipaabot na lang karon sa katawhan nga madakpan na ang tanang naapil sa pag-masaker ni Degamo ug pipila ka mga sibilyan ug mapasakaan og kaso kriminal silang tanan.

Labi na gyod kon maapil nga makasohan ang gituhoang utok sa maong pagpatay.

* * *

Samgtang dunay koneksiyon sa kamatayon si Gobernador Roel, matod pa ni Mayor Janice.

Kon kahinumdoman, midaog nga senior board member lang si Roel Degamo pero nahimong bise gobernador sa dihang namatay ang kanhi gobernador nga si Emilio Macias II.

Sa dihang siya na ang bise gobernador, namatay na sab ang gobernador nga si Gov. Agustin Perdices mao nga sulod sa maong termino, kaduha nisaka sa posisyon si Roel Degamo hangtod nga siya na gyod ang nahimong gobernador.

Nakompleto gyod niya ang termino nila ni Macias ug Perdices ug midagan siya pagka-gobernador ug nidaog kaniadtong 2013.

Bisan pa sa hulga sa iyang kinabuhi, matod pa ni Mayor Janice, padayon nga serbisyo sa katawhan ang gihimo ni Gov Roel, hangtod gani sa katapusang yugto sa iyang kinabuhi.

Related Stories

No stories found.
SunStar Publishing Inc.
www.sunstar.com.ph