Dili nato matagna kanus-a, unsang pamaagi ug asang dapita kuhaon ang atong hinuwaman nga kinabuhi sa Labawng Makagagahom. Apan ang usa ka pagtaliwan sa laing kalibotan, momugna og dakong kasub-anan.
Kini ang gibati sa lokal nga media tungod sa kamatayon sa kauban sa buhat nga si Pegeen Maisie Sararaña, 24, taga dakbayan sa Carcar ug reporter sa Cebu Daily News, tungod sa aksidente sa dalan sa lungsod sa San Jose, Negros Oriental, alas 3:10 sa hapon sa Dominggo, Marso 12, 2023.
Si Sararaña niadto sa Negros dungan sa mga kauban sa buhat sa Sugbo aron paghagdaw og mga kasayoran ug kalamboan sa imbestigasyon sa Pamplona massacre, diin nikalas ni anhing Governor Roel Degamo ug walo ka mga tawo niadtong Marso 4, 2023.
Sumala sa taho, ang batan-ong mamahayag niangkas sa motorsiklo nga gimaneho sa iyang kaila nga si Niel Ian Mascardo Balcobero, diin naghunong lang unta sa usa ka eskina apan naigo sa trak de karga nga giingong daplin na kaayo dihang kalit nga nilusot aron mouna sa laing sakyanan.
Si Sararaña nalagpot ug nabunal sa dalan. Nakaangkon og grabeng samad ug bun-og sa iyang ulo ug ubang bahin sa lawas. Gidala sa usa ka ospital apan Lunes sa gabii, Marso 13, 2023, nabugtoan kini sa kinabuhi.
Usa ka batan-on ug bag-o pa sa media si Sararaña, apan lawom na ang iyang kasinatian ug ilado sa lokal nga komunidad sa mamahayag tungod sa pagtaho sa mga dagkong hitabo, gawas pa, mahigalaon usab sa iyang mga kauban sa media.
Ang mga sakop sa media, labi na sa nakauban niya sa coverage sa Negros Oriental, dunay tagsa-tagsa ka istorya bahin ni Sararaña sa trabaho o personal. Ang labing apektado sa nahitabo mao ang iyang mga ginikanan o pamilya ug kabanay sa Carcar.
Wa kitay mahimo, mibalik na siya sa sabakan sa Magbubuhat. Takos siya sa atong pag-ampo nga magmalinawon sa dayon. Busa, ang staff ug tagdumala sa Superbalita Cebu miduyog sa pagbangutan sa kamatayon sa higala ug kauban nga si Pegeen Maisie Sararaña.