Kinahanglang likayan sa mga ginikanan ang pagpaeskwela sa ilang mga anak o pag-adto sa gawas kon sila adunay sintomas sa makatakod nga sakit sa hand, foot and mouth disease (HFMD), matod sa Cebu City Health Official.
Si Cebu City Health Department Health Officer Dr. Daisy Villa niingon atol sa Openline Forum sa Martes, Marso 14 nga kon ang mga ginikanan makamatikod sa mga rashes ug blisters sa mga kamot, tiil, ug baba sa ilang mga anak, iya silang giawhag nga magpatambal dayon.
Si Villa niingon nga ang HFMD adunay incubation period nga duha ka mga semana ug ang mga sintomas naglakip sa low grade fever, ubo, runny nose, ug rashes ug blisters.
Usab, ang sakit nga dala sa virus makatakod ug ang mga simtomas kasagaran mograbe sulod sa usa ka semana.
Sa pagkakaron, adunay 77 ka na-report nga HFMD cases sa siyudad gikan sa Enero hangtod Marso 2023, samtang laing lima ka gisuspetsahan nga mga kaso ang giobserbahan.
Matod ni Villa nga kining maong mga numero makonsiderar nga ‘alarming’ tungod kay ang Cebu City nakatala lang og duha ka mga kaso sa HFMD ubos sa samang panahon niadtong 2022.
“We have to strongly encourage the parents and the schools nga kung naay symptoms kay as much as possible kay dili lang nato pa-eskwelahon,” matod ni Villa.
Siya nidugang nga ang City Health nakaobserbar nga ang viral nga sakit kay kasagaran naa sa mga eskwelahan, kasagaran sa mga bata nga nag-edad og 1 ngadto sa 5 anyos.
Nakig-alayon na usab si Villa sa mga school administration sa Siyudad sa pagpakusog sa disinfection sa ilang lugar.
Giawhag usab niya ang mga tunghaan sa paghingusog sa awareness campaign sa saktong sanitasyon sama sa paghugas sa kamot aron malikayan ang pagkuyanap sa sakit.
Bisan pa kon ang HFMD dili hulga sa kinabuhi, gidugang ni Villa nga kon dili matambalan ang mga komplikasyon sama sa dehydration sa nataptan nga indibidwal, mahimo kining hinungdan sa pagkamatay.