Mohatag ang Kagamhanan sa lalawigan sa Sugbo og pinansyal nga ayuda ngadto sa hog raisers, kinsang mga baboy naapil sa gipangpatay gumikan sa epekto sa African swine fever (ASF).
Gipahibawo ni Cebu Governor Gwendolyn Garcia nga andam ang Kapitolyo sa pagbayad sa matag baboy gikan sa mga apektadong barangay diin gipamatay ang mga binuhi subay sa proseso sa Department of Agriculture (DA) kon mataptan og ASF ang mga hayop.
“I already told Mayor Patrick, okay we will help. I know you don’t have a budget for that. The province will now compensate for the pigs that were killed,” matod ni Garcia atol sa pakighinabi sa mga tigbalita sa Marso 13.
Ang Kapitolyo mogahin og P5,000 sa matag baboy nga naapil sa pag-cull.
Mao kini ang maximum nga ayuda nga ihatag sa Kapitolyo depende usab sa market value sa mga baboy.
Kini human nga temporaryong gipahunong ni Garcia ang pagpatay sa mga baboy sa Brgy. Guadalupe, dakbayan sa Carcar nga gisuspetsahan nga kontaminado sa ASF.
Sa datos nga giluwatan sa gobernador, anaa sa 141 na ka mga baboy ang na cull.
Samtang si Carcar City Administrator, Jose Marie Poblete, nipahibawo nga natala nila ang di momenos sa 1,000 ka mga tawo ang nagduma og backyard farms, dugang sa 50 ka registered operators nga nagbuhi og tag duha ngadto sa 30 ka buok binuhing baboy.