Moabot sa 13 ka mga tinun-an ang gipangtabang human nga giingong nasudlan og dautang espiritu samtang nagklase sa Patupat National High School, Brgy. Patupat, lungsod sa Barili.
Gikompirmar sa kapulisan sa lungsod pinaagi kang Police Staff Sergeant Carlos Dicdican nga nahitabo kini alas 8:30 sa buntag sa Marso 14, 2023.
Inabagan sa Municipal Disaster Risk Reduction and Management Office (MDRRMO) sa lungsod, 10 ang gidiretso nga gipangdala sa simbahan sa Birhen Delos Remedios alang sa pagpatambal sa pari nga exorcist, samtang ang uban gidala sa infirmary.
Pulos mga babayeng tinun-an sa Grade 7, junior high ug senior high school nga nagpangedaron og 15 ngadto sa 16 anyos ang gituohang nasudlan og dautang espiritu.
Matod ni Patupat Barangay Kapitan Angelito Nemeño nga daan nang nabantayan nga daw nagluya ug naglain ang pamati sa pipila ka mga tinun-an sa Marso 13.
“Ang nahibaw-an nako diha to nagsugod kanang camp fire last year. Mga bata tingali nagduwa-duwa siguro. Pero the other day wala lang gyud to panumbalinga kay ingon napasmo lang walay kaon ana. Pero ang gipakita sa bata murag kanang isog nga lahi na og sinultian,” matod ni Nemeño.
Dugang niya nga nahibulong sab ang kadaghanan sa mga magtutudlo sa maong tunghaan sanglit dili man kakahoyan ang nahimutangan niini.
“Karong adlawa, nibalik na og eskwela. Karon maoy pinakadaghan, nikuyanap na. Lain kaayo kay mosinggit na man og pahawa kay hutdon ta mo og patay. Moduol ka ingnon kag pahawa,” dugang ni Nemeño.
Subay niini, gisugyot niya sa principal sa tunghaan nga temporaryo unang hunungon ang klase samtang magpaalim pa ang mga biktima.
Ingon man mopahigayon una og bendisyon ug misa aron pag-abog sa dautang mga espiritu.
Niuyon usab siya sa plano sa tunghaan nga mopahigayon og santos nga misa ka usa sa usa ka buwan.
Samtang si Fr. Reynaldo Cui, usa ka exorcist, maoy nitabang sa mga tinun-an, niingon nga “mass hysteria” ang nahitabo.
Matod ni Cui nga giingong dunay nakit-an nga anino sa usa ka lalaki ang mga biktima.
Iyang gipasabot nga dili pa matawag nga possessed ang mga biktima kon i-base sa kategoriya sa pagtuon sa exorcism.
“Dili pa man gyud to matawag nga possession actually kay sa classification ana sa exorcism literature, mura na siya’g oppression. Kay naa may auditory hauntings, naa may visions, apparitions.
“Kay ang possessed gyud nga tawo mausab man ang tingog. Ganiha ila lang gihapon tingog pero kusgan,” matod ni Cui.