Magpadayon sa ilang pagbiyahe ang kapin o kulang 170 ka mga modernized public utility vehicles (MPUV) sa Metro Cebu bisan kon mo-expire na ang 45 ka adlaw nga gihatag nga pagtugot sa Kapitolyo ug Land Transportation Franchising and Regulatory Board karong Marso 17, 2023.
Si LTFRB 7 Regional Director Eduardo Montealto Jr. nagkanayon nga ang 45 ka mga adlaw mao ang tagal nga gihatag sa Lalawigan ug LTFRB 7 nga makaduso ang mga local government unit (LGU) sa ilang tagsa-tagsa ka local public transport route plan (LPTRP).
Ang labing taas nga opisyal sa LTFRB 7 nitug-an sa Superbalita Cebu nga naka-submit na ang 43 ka mga LGU sa ilang LPTRP ngadto sa ilang buhatan.
Gitug-an ni Montealto nga ang Kapitolyo mao sab ang nihan-ay sa mga LPTRP alang sa inter-LGU nga rota nga giduso ngadto sa ilang buhatan ug ang LTFRB na usab ang mohatag niini ngadto sa ilang central office alang sa approval.
Ang mga LGU nga way LPTRP sama sa lungsod sa Cordova, isyuhan sa LTFRB og special notice of compliance sanglit wala silay kaugalingon nga mga modernized PUJ o tradisyonal PUJ nga nagbiyahian sulod sa lungsod sanglit ang mga namasaherong mga PUV igo rang moagi sa ilang dapit.
Ang Mandaue City nahuman na sa ilang LPTRP ug aprobado na sa LTFRB Central Office, dugang ni Montealto.
Samtang ang Cebu City pending pa gumikan sa mga rota nga giusab para mapatas-an ang rota sa mga MPUJ ug bus aron mas daghan pa ang mga pasahero nga maserbisyohan.
Si Montealto nagpasalamat ngadto kang Garcia sanglit napaspasan ang paghimo sa mga LPTRP aron usab mapadali ang pag-aprobar sa ilang central office aron ma-regular na ang biyahe sa mga public utility vehicle. (PAC)