Karon nakompirmar sa mga magbabalaud sa Ubos Balay Balauranan nga gibuhat diay ang recycling sa ilegal nga drugas tungod kay giingong ganti kini sa kapulisan ug Philippine Drug Enforcement Agency (PDEA) sa mga informant sa ilang mga buy-bust.
Unang nibutyag niini si PDEA Director General Moro Lazo niadtong Pebrero.
Sa usa ka pamahayag, si Kongresista ug House dangerous drugs committee chairman Robert Ace Barbers nibutyag nga usa ka informant nibutyag sa ilang closed door meeting nga 30-70 porsiyento sa illegal drugs nga nasakmit gihatag ngadto sa informants.
Kon si Lazo nga dakong opisyal sa PDEA niangkon niini ug gikompirmar sa usa ka informant, tinuod gyud diay ang dugay nang pagduda sa publiko nga dunay recycling sa illegal drugs.
Matod ni Barbers nga mga duha ka dekada na kining gihimo sa mga awtoridad.
Kon gihimo kini sa kaulohan, di ba kaha mao ni ang standard operating procedure (SOP) sa ubang mga dapit sa nasod, labina dinhi sa Sugbo? Posible ni. Hinuon gipanghimakak na kini sa ilang regional nga buhatan.
Kon tinuod nga naa kini sa mga informant, ila ning ibaligya ug kay informant man, protected sila sa mga awtoridad.
Bisan ibutang lang nga wa kini gihimo dinhi sa Sugbo, apan gipraktis sa ubang mga dapit sa Sugbo, mao lang gihapon ni ang hinungdan sa nagbalikbalik nga problema sa illegal drugs. Kay ang illegal drugs gikan sa kaulohan, i-distribute og lakip dinhi sa Sugbo.
Yuna pa, sa 2022, ang nasakmit nga illegal drugs sa nasod moabot og P30 bilyunes. Nagpasabot ba nga dunay labing minos 30-70 porsiyento nga wa gitug-an niini?
Sa ato pa mas dako pa unta ang balor sa ilegal nga drugas nga nasakmit? O tipik ning mao nga kantidad nahiadto sa mga informant alang sa recycling?
Hinaut pang kining nabutyag karon masanta na kay dako kaayo ning sagpa sa anti-illegal drug operatives ug sa kagamhanan mismo.
Kawang lang ang kampanya tungod kay mahibalik ra sab diay sa karsada ang tipik sa illegal drugs nga nasakmit. Mas kuyaw pa kay ang namaligya duna na may koneksyon sa mga awtoridad, busa di dakpon.
Mao sab ni ang nagtintal niadtong mga scalawag nga nahimo nang drug protector, inay maoy tiggukod sa mga durugista.