Ang Technical Education and Skills Development Authority (Tesda) nagpadayon sa ilang pakigtambayayong sa usa ka Japanese air conditioning company aron mahimong mas hanas ang Filipino technician.
Giinagurahan sa Tesda sa Miyerkules, Marso 15, 2023 ang bag-ong Heating, Ventilation, and Air Conditioning (HVAC) training facility sa rehiyonal nga buhatan sa Tesda Lahug, Cebu City.
Ang pagbansay sa HVAC nagsugod na sa miaging bulan, apan bukas gihapon sa pagdawat sa mga kwalipikado nga trainees nga labing menos graduwado sa high school ug adunay kasinatian sa industriya.
Ang 250-square meter nga pasilidad usa ka karaang building nga giayo sa Daikin Philippines, mao ang ikatulo nga HVAC training center sa nasud nga gipasiugdahan sa air conditioning company.
Ang laing duha ka HVAC training centers nahimutang sa Taguig City sa National Capital Region, ug Davao City sa Region XI.
Gawas sa pag-ayo sa pasilidad, ang Daikin Philippines ni-supply usab og moderno nga mga gamit ug ekipo sa pagbansay.
Si Wilkie Reroma, administrator sa Regional Training Center-Cebu sa Tesda VII, nipadayag sa iyang pasalamat sa Daikin Philippines sa pakig-alayon sa Tesda alang niining maong programa.
“Daghan kaayo mig pasalamat sa Daikin, nakatabang sila sa pag-upgrade sa among mga ekipo isip kabahin sa among resource sharing,” matod ni Reroma.
Matod pa ni Reroma nga tumong sa maong programa nga makapahuman og dili mominus 50 ka technicians matag tuig sa mosunod nga lima ka tuig.
Ang mga kuwalipikadong benepisyaryo pagabansayon aron mahimong National Certificate (NC) level III qualified technicians. Ang bise presidente sa Daikin Philippines, Ikuo Kani, niingon sa iyang pakighinabi sa SunStar Cebu, nga gusto nilang motabang sa pag-upgrade sa mga Filipino technician.
“Sa Pilipinas kulang ang kahanas, gusto sa Daikin nga motabang sa pag-upgrade,” matod niya. Gibutyag usab niya nga nakahukom sila nga makigtambayayong sa Tesda sa pagtukod og training center sa dakbayan sa Sugbo isip kabahin sa paghatag og balik sa mga konsumidor niini.
“Naa ta ani nga pilosopiya nga nagnegosyo mi sa Pilipinas ug nakakuwarta mi. Pero dili lang mi para makakuwarta, gusto namong ibalik ang kamaayo sa Pilipinas,” matod ni Kani. (KJF)