Mopatuman ang Visayan Electric og pagkunhod ngadto sa 94 centavos sa naandan nga residential rate niini alang sa billing sa bulan sa Marso-Abril.
Kini nagtimaan sa ikaupat nga sunodsunod nga bulan nga gipatuman sa kompaniya nga pagkunhod sa rate.
Ang P0.94-centavo rate reduction sa residential rate mobalor ngadto sa P14.25 matag kWh, nagpasabot og savings hangtod sa P188 alang niadtong panimalay nga adunay average sa binuwan nga konsumo sa kuryente nga 200kWh.
Sumala sa electric utility firm, ang pagkunhod sa rate tungod sa ubos nga presyo sa coal sa merkado sa kalibutan, nga nagtugot kanila sa pagpaubos sa ilang generation charges.
Kini miresulta sa pagkunhod sa kinatibuk-ang gasto sa kuryente nga nakabenepisyo sa mga kustomer sa Visayan Electric.
Bisan pa sa pagkunhod sa rate, gitambagan sa kompaniya ang mga kostumer nga magdaginot sa kuryente aron malikayan ang taas nga bayrunon, ilabina sa nagsingabot nga mga bulan sa ting-init.
Ang Presidente ug Chief Operating Officer sa Visayan Electric, Raul C. Lucero niingon: “We are committed to providing our customers with reliable and affordable electricity. With the low price of coal in the world market, we are able to pass on the savings to our customers through this rate reduction.”
Sayo ning tuiga, ang Department of Energy (DOE) nipagawas og pasidaan nga posibleng adunay yellow alerts sa mga Visayas grid atol sa summer months tungod sa taas nga panginahanglan sa kuryente uban sa dugang nga paggamit sa air conditioning ug uban pang cooling appliances.
Ang Visayan Electric, subay sa pahimangno sa DOE, nagtambag sa mga kustomer niini nga magdaginot sa ilang konsumo sa enerhiya aron malikayan ang taas nga bayrunon ug posibleng pagkapalong sa kuryente.
Ang kompaniya nag-awhag sa mga kustomer sa pagbalhin sa ilang high-energy nga mga kalihukan ngadto sa dili peak hours, sama sa sayo sa buntag o lawom nga gabii aron makatabang sa pagpagaan sa panginahanglan sa elektrisidad panahon sa peak hours. (PR)